O custe da terra en Galicia, é negocio hoxe ter terreos agrícolas?

O informe 'Suelo Agrario en España 2023', elaborado por Tinsa, empresa de taxación de terreos e inmobiliarias, expresa unha suba nos prezos da terra agraria en todo o Estado, sobre todo aquela que ten cultivos de rega. O informe desta empresa cínguese a unha serie de cultivos: herbáceos, oliveira, viña, froita non cítrica, cítricos, hortalizas e invernadoiros e prados e pastos. Así, segundo o tipo de cultivo, os prezos varían en metro cadrado mesmo dentro das mesmas comarcas. O caso galego para esta empresa é paradigmático en canto ao valor que teñen as fincas do norte da Península fronte ao resto do territorio. A actividade gandeira mantén o prezo dos pastos e prados do norte peninsular moi por encima dos terreos de centro e sur.

VALORES

Segundo os datos de Tinsa os prezos da hectárea de pasto en Galicia é de 17.700 euros por hectárea, superando a media de 10.200 euros por hectárea no resto do Estado. Os terreos onde se cultiva viña, os prezos por hectárea están en 37.800 euros por hectárea en secano e 38.900 euros por hectárea de rega. E isto nun momento en que a crise de precipitacións e os fluxos climáticos están cambiando comportamentos nos ciclos do cultivo e alimentación do gando.

Uns prezos elevados como os dos terreos dedicados a viña pode impedir a entrada de pequenos viticultores e favorecer a entrada de grandes empresas con intereses especulativos. “A revalorización do terreo non é nada malo, o caso é producir e non especular” di José Ramón González de Unións Agrarias (UUAA).

Estamos diante dun fenómeno similar ao do terreo para construír, hai lugares onde é posible acceder a unha finca e outros que é practicamente imposible para moitos interesados. “Acceder a un terreo asequible economicamente axuda a facer fronte aos gastos de produción” di González. Porén, os datos ofrecidos no informe de Tinsa non son, en si mesmos, unha guía sólida se se busca ter un “mapa” de  prezos por lugares.

VARIABILIDADE

A situación da contorna supón un factor moi determinante sobre o valor dunha finca. En áreas onde o abandono do rural é máis pronunciado, as apostas para poñer en valor as fincas deben ser máis decididas, sobre todo de cara ao cultivo ou ao pasto. “O prezo medio ofrecido polo informe de Tinsa sobre áreas de pasto e prado varía moito dun lugar a outro en Galicia onde temos zonas en que o metro cadrado pode ir a 50 céntimos” e zonas onde supere por moito ese prezo.

Un exemplo son as áreas onde o terreo de uso agrario entra en competencia co espazo forestal. En áreas así, onde existe un “mosaico” de eucaliptais con prados, os prezos son moi elevados e entrar a comprar terras supón un forte desembolso. “Aí é necesaria a ordenación do territorio, delimitar espazos” di González.

Contactados coa propia Tinsa e preguntados polo seu informe, a resposta que deu é que o elevado valor das terras no Norte débese á maior pluviosidade do lugar e isto favorece a produción dos prados e pastos, elemento que os fai máis competitivos. Sobre o viño, só mencionan a consolidación das diferentes Denominacións de Orixe, factor de grande impacto sobre o valor das terras. Por último, apuntan que a competitividade das terras tamén depende dos cultivos que se dean en cada unha delas.

O informe de Tinsa, aínda que centrándose nalgúns cultivos determinados, non profunda dabondo para dar unha visión completa sobre o valor do chan agrario sexa cal sexa o tipo de produción. Aínda que ten en conta factores como o cambio climático e a posible necesidade de cambiar os cultivos, faltan puntos que describan polo miúdo os items que interveñen no proceso de valorización ou devaluación dun terreo.