18F.- O BNG pídelle á CRTVG cinco debates e maior cobertura informativa

O BNG reclamou ante a xunta electoral que o plan de cobertura da Corporación de Radio e Televisión de Galicia (CRTVG) para as eleccións autonómicas amplíe o tempo da cobertura informativa durante a campaña e que se contemplen debates nas catro circunscricións electorais. Ademais, os nacionalistas consideran que o plan do ente público "non cumpre co deber como medio público de garantir o pluralismo político e social".

Así, denuncian que se produce unha redución do tempo na información diaria específica da campaña electoral con respecto ao plan de cobertura de 2020. Aínda que recoñece que se garda a proporcionalidade entre as formacións, o BNG apunta que "a redución de 370 segundos a 200 segundos non se xustifica".

Nesta liña, expón na súa reclamación que no anterior proceso electoral a formación política En Marea, cun 19,07% tiña 65 segundos de información, mentres que no presente plan, o BNG, cun 23,79%, conta con 52 segundos de cobertura, "sen que haxa xustificación, tratándose dunha redución máis nun plan de cobertura xa precario".

Doutra banda, o Bloque critica que se contemple "un único debate que se emitirá para toda Galicia na televisión e na Radio Galega", en lugar de "cinco debates entre os representantes das candidaturas, un que se difundía simultaneamente e outro catro que se divulgaban en cada unha das desconexións provinciais".

"A desaparición das desconexións territoriais neste plan de cobertura é un dos factores que máis agudiza o limitado deste plan, xa que nunhas eleccións ao Parlamento de Galicia, onde a circunscrición electoral é a provincial, o ente público debe proporcionar toda a información ao electorado sobre as propostas e candidatos e candidatas que se presentan pola circunscrición que votan", sostén.

Ana Pontón en declaracións aos medios en Santiago.