Un 11,4 % das mortes en Galicia no 2017 foron debido ao tabaco
Esta é unha das conclusións da tese doutoral desenvolvida pola investigadora Julia Rei Brandariz, que realizou o primeiro estudo que estima a MA ao consumo de tabaco dun mesmo ano en todas as comunidades autónomas de España empregando as mesmas fontes de información e unha metodoloxía común.
Por Europa Press / Redacción | SANTIAGO DE COMPOSTELA | 30/01/2024 | Actualizada ás 18:09
A carga de mortalidade atribuída (MA) ao consumo de tabaco en Galicia no ano 2017 foi do 11,4 %. Esta é unha das conclusións da tese doutoral desenvolvida pola investigadora Julia Rei Brandariz, que realizou o primeiro estudo que estima a MA ao consumo de tabaco dun mesmo ano en todas as comunidades autónomas de España empregando as mesmas fontes de información e unha metodoloxía común.
Segundo destacou a USC, a análise de Rei Brandariz sinala que se rexistraron un total de 53.825 mortes de persoas maiores de 35 anos atribuídas ao consumo desta sustancia en toda España, o que representa o 12,9 % da mortalidade total dese ano. Un terzo dos falecementos foron provocados por cancro de pulmón, seguido de enfermidades cardiovasculares e enfermidade pulmonar obstructiva crónica.
Por comunidades, esta porcentaxe oscila entre o 10,8 % da Rioxa e o 15,3 % de Canarias. Entre os homes, a porcentaxe de mortes atribuídas ao consumo de tabaco sobre a mortalidade observada total vai entre o 24,6 % en Estremadura e o 18,4 % da Rioxa; mentres que no caso das mulleres sitúase entre o 6,6 % de Canarias e o 2,3 % de Castela e A Mancha.
Así, a MA ao consumo de tabaco é maior nos homes de todas as comunidades, sendo Andalucía a comunidade na que o tabaco causa un maior impacto na mortalidade por enfermidade cardiovascular. "A pesar de que se observou nos últimos anos un importante descenso na mortalidade por enfermidade cardiovascular asociada ao tabaquismo, o consumo de tabaco segue sendo un factor de risco moi relevante neste tipo de patoloxías", explica a investigadora nun dos artigos que integran a tese de doutoramento.
Segundo o estudo, en Galicia rexistráronse máis de 3.000 mortes relacionadas co tabaco durante ese ano, cunha distribución das causas similar á observada no resto de España. A obtención deste tipo de estimacións, que aplican unha metodoloxía epidemiolóxica "complexa", é de "gran utilidade" para a formulación de políticas sanitarias dirixidas á prevención e promoción de saúde pública.
RADON
Ademais, a tese de Rei Brandariz, dirixida polos profesores Alberto Ruano e Mónica Pérez, inclúe a estimación da mortalidade causada en España pola exposición a radon residencial por comunidades autónomas. Neste caso, detallou que, aínda que a nivel estatal a exposición a radon residencial inflúe no 4 % da mortalidade por cancro de pulmón, esta porcentaxe sobe ao 7 % nas comunidades máis afectadas, entre elas Galicia. Os cálculos realizados para esta tese serviron de base para a elaboración do Plan Nacional de Radon, que se aprobou recentemente no Consello de Ministros.
