Yolanda Castaño, Portocabo e a compañía circense PistaCatro, Premios da Cultura Galega 2023

A igrexa do antigo convento pontevedrés de Santa Clara acolleu este mércores a gala de entrega dos Premios da Cultura Galega 2023, repartidos en oito categorías. A poeta Yolanda Castaño foi premiada na modalidade de Letras; o labor de investigación de Eduardo Pardo de Guevara sobre os galegos da Idade Media recibiu o premio na modalidade de Patrimonio Cultural e a lonxevidade da Banda de Música Unión de Guliáns, con 150 anos de vida e que levou o recoñecemento na categoría de Música.

Tamén foron premiadas: a produtora Portocabo (en Audiovisual); o talento do circo de PistaCatro (en Artes Escénicas) e o Museo do Gravado á Estampa Dixital, de Ribeira (en Artes Visuais), o programa Ponche... nas ondas (modalidade Lingua) e os cursos de verán Galego sen fronteiras, premiados na categoría de Proxección Exterior.

Na súa intervención durante este acto o presidente da Xunta, Alfonso Rueda erixiu á cultura galega como reflexo da "liberdade, diversidade e unidade" que existe en Galicia, á vez que se mostrou convencido que está a vivir un "novo rexurdimento" que está a facer crecer a comunidade. "Se miramos cara ao futuro, vemos unha cultura inclusiva, pola que todos temos que traballar, e que seguirá sendo sinónimo de benestar, de orgullo, de irmandade e de potencia dun pobo", manifestou o presidente.

Pola súa banda, o presidente da Deputación de Pontevedra, Luís López, situou a Santa Clara como un "futuro centro de referencia do sector cultural de Galicia" que está chamado a ser "un fervedoiro cultural, un escaparate único no que expor todo o potencial cultural e artístico de Galicia".

Ademais dos presidentes da Xunta de Galicia e da Deputación de Pontevedra tamén participaron nesta gala de entrega de premios o conselleiro de Cultura, Román Rodríguez; a vicepresidenta primeira da Deputación, Marta Fernández-Tapias; e o alcalde de Pontevedra, Miguel Anxo Fernández Lores. O acto estivo conducido pola xornalista María Cheda e contou coas actuacións musicais de Caamaño&Ameixeiras e Catuxa Salom.

O presidente da Xunta de Galicia, Alfonso Rueda, na entrega dos Premios da Cultura Galega 2023, en Pontevedra. DAVID CABEZON @ XUNTA | Fonte: Europa Press