O Foro Galego de Imigración urxe á regularización inmediata das persoas vítimas de explotación laboral
Solicita tamén unha indemnización económica "máis alta" para a familia da vítima dun accidente laboral en Carballo.
Por Europa Press / Redacción | SANTIAGO DE COMPOSTELA | 03/03/2024 | Actualizada ás 18:10
O Foro Galego de Inmigración urxe a concesión inmediata de autorizacións de residencia ás persoas vítimas de explotación laboral, así como de retención ilegal, agresión sexual e trata, entre outros. Solicita, ademais, as axudas públicas necesarias "para o seu mantemento en condicións dignas" e "o máximo rigor na investigación xudicial derivada".
Así o trasladou o Foro nun comunicado, despois de que este sábado transcendese que un veciño de Mesía fora detido acusado de agredir sexualmente a empregadas e captar inmigrantes para traballar en prostíbulos. Así mesmo, tras a morte dun traballador nunha obra en Carballo, o Foro demanda, "a pesar da súa situación irregular", as indemnizacións económicas que a normativa establece nestes casos para a familia do falecido, "máis altas" que as que se coñecen ata agora e que considera "ridículas".
Sobre este caso, reclama tamén unha investigación xudicial á empresa responsable que "aparentemente cometeu graves delitos no ámbito da seguridade laboral e da explotación de traballadores migrantes".
CAMBIO LEXISLATIVO
"Estes dous casos son exemplos concretos da grave situación de indefensión na que se atopan as persoas migrantes residentes en Galicia e no conxunto do Estado, vítimas inocentes de persoas e empresas que pretenden aproveitarse desta situación, pero sobre todo vítimas da lexislación que condena ás persoas migrantes a pasar un longo tempo en situación de irregularidade administrativa, antes de poder regularizar a súa situación", denuncia a organización.
Doutra banda, o Foro considera que, para evitar este tipo de situacións, débese aprobar "inmediatamente" a Iniciativa Lexislativa Popular Regularización Xa, que está na mesa do Parlamento desde 2023, ademais de modificar a Lei de Estranxeiría para "garantir formas de acceso regular razoables ás persoas que queren facer aquí un proxecto de vida; e doutra banda, evitar situacións de irregularidade administrativa", porque "ningún ser humano é ilegal".
