Un total de 70 novos pediatras con praza fixa para os centros médicos e hospitais do Sergas, agás en Cervo e Viveiro
Dúas prazas en centros de saúde, en Cervo e Viveiro, quedan vacantes e volverán convocarse.
Por Europa Press / Redacción | SANTIAGO DE COMPOSTELA | 18/03/2024 | Actualizada ás 17:16
O Diario Oficial de Galicia (DOG) publicou este luns dúas resolucións polas que se adxudica destino definitivo a 70 pediatras, 58 de atención primaria e 12 de hospitais comarcais, que obtiveron no Servizo Galego de Saúde (Sergas) unha praza fixa por concurso de méritos, é dicir, sen oposición. A partir de agora, ábrese o prazo dun mes, ata o 18 de abril, para que se incorporen ao seu novo posto.
Esta resolución avanzáraa o presidente da Xunta en funcións, Alfonso Rueda, tras a reunión do Consello do pasado 29 de febreiro. Entón, xa advertía que había dúas prazas convocadas a través deste proceso que se quedaron vacantes, concretamente nos centros de saúde de Cervo e Viveiro, na comarca da Mariña. En canto ás 70 vacantes que si se cubriron, a listaxe de admitidos figura en dúas resolucións da directora xeral de Recursos Humanos do Sergas, Ana Comesaña.
Unha delas, coa relación de 58 profesionais en centros de saúde: 15 para a área sanitaria de Vigo, 12 para a da Coruña-Cee, nove para a de Santiago-Barbanza, outro nove en Lugo-A Mariña-Monforte, sete en Pontevedra-O Salnés, cinco en Ourense-Verín-O Barco de Valdeorras e tres en Ferrol. En canto aos hospitais, serán catro no hospital de Vilagarcía de Arousa; dous nos de Ribeira, Burela e Verín, respectivamente; e un nos de Monforte e O Barco de Valdeorras, respectivamente.
Este proceso por concurso (tivéronse en conta aspectos como a experiencia previa e o currículo dos aspirantes) resolveuse en menos de 10 meses, ao convocarse en maio de 2023 e tras unha reforma legal aprobada polo Parlamento de Galicia en outubro de 2022. Así, os postos ofertados, fóra dos dous en Cervo e Viveiro, contarán cun profesional fixo que poderá tomar posesión ata o 18 de abril. En caso de non incorporación, o Sergas poderá adxudicar a praza a outro dos aspirantes.
