A natalidade segue baixando en Galicia mes a mes, pese á suba a nivel estatal
O número de nacementos en Galicia cae un 0,87 % en xaneiro, ata 1.142 bebés.
Por Europa Press / Redacción | SANTIAGO DE COMPOSTELA | 20/03/2024 | Actualizada ás 10:04
Galicia contabilizou un total de 1.142 nacementos o pasado xaneiro, o que supón un 0,87 % menos que no mesmo mes de 2023, segundo a estimación do Instituto Nacional de Estatística (INE) publicada este mércores. Esta cifra contrasta coa rexistrada a nivel estatal, xa que no total de España no primeiro mes do ano anotáronse 27.413 nenos, un 1,19 % máis.
En canto á idade das nais galegas, a maioría tiña entre 35 e 39 anos, con 376 bebés, seguíndolle o rango de entre os 30 e 34 anos, con 342 nenos. Unhas 146 mulleres foron nai entre os 40 e os 44 anos en xaneiro, mentres que 186 con entre 25 e 29 anos. Ademais, sete mozos de entre 15 e 19 anos tiveron un bebé en xaneiro en Galicia; 16 mulleres con entre 45 e 49 anos, así como 2 con 50 anos ou máis.
DEFUNCIÓNS
Pola súa banda, o INE tamén publica este mércores a estatística de defuncións. Ata a semana 9 deste ano (do 26 de febreiro ao 3 de marzo), faleceron en Galicia 6.579 persoas, un 0,98% menos que no mesmo período de 2023. A nivel estatal, esta cifra foi de 88.789 falecementos, un 0,21 % menos que nas nove primeiras semanas do ano pasado.
DATOS NACIONAIS
O número de nenos nados no mes de xaneiro en toda España ascendeu a 27.413, un 1,1 % máis que no mesmo período de 2023, dos cales 13.194 foron mulleres e 14.219 homes, segundo datos do Instituto Nacional de Estatística (INE). En canto á idade da nai, a maior parte dos alumeamentos corresponden a nai de 30 a 34 anos (4.345 nacementos), seguidas de nais entre os 35 e os 39 anos (3.935) e de 25 a 29 anos (2.272) e de 20 a 24 anos (991). Un total de 228 partos rexistráronse en nais de 15 a 19 anos e dous entre adolescentes de menos de 15 anos. Os nacementos en mulleres de máis de 40 anos ascenden a 1.420, dos cales 18 foron partos de mulleres de máis de 50 anos.
Por comunidades autónomas, Andalucía (5.122), Cataluña (4.747), Comunidade de Madrid (4.584) e Comunidade Valenciana (3.056) foron as que rexistraron maior número de nacementos, seguidas de País Vasco (1.165), Galicia (1.142), Castela-A Mancha (1.101), Castela e León (1.086), Murcia (1.058), Canarias (939), Baleares (789), Aragón (684), Estremadura (529), Asturias (376), Navarra (373), Cantabria (319), A Rioxa (210), Melilla (78) e Ceuta (57). Respecto das defuncións ata principios de marzo rexistráronse 88.789 mortes, 191 persoas menos que no mesmo período do ano pasado. As comunidades con máis falecidos foron Andalucía con 15.060 falecementos, Cataluña con 13.922 e Comunidade de Madrid con 9.743.
