Santiago aproba de os orzamentos sen atender ás alegacións dos traballadores do Concello nin dos veciños de Volta do Castro

O pleno do Concello de Santiago aprobou este mércores de maneira definitiva os orzamentos municipais para o ano 2024, que ascenden a 142 millóns de euros e que contaron co apoio, ademais dos grupos de goberno (Compostela Aberta e BNG), co voto favorable do PSOE e a oposición do PP, aínda que os dous grupos da oposición afearon á alcaldesa a súa "falta de transparencia e de diálogo" neste proceso.

O pleno municipal arrincaba coa aprobación definitiva dos orzamentos de Santiago para 2024 e do seu cadro de persoal para o próximo exercicio, un punto no que interveu o edil de Economía e Facenda, Manuel César, para debullar as alegacións recibidas polas contas, fundamentalmente relativas ao capítulo 1, de persoal.

En concreto, comunicou que se recibiron 39 alegacións de traballadores e unha conxunta da CIG, así como unha alegación da Asociación de Veciños de Volta do Castro en relación ás intervencións comprometidas nesta área e que non se inclúen nos orzamentos do próximo ano. As reclamacións dos traballadores, apuntou o edil, "todas cun texto idéntico", solicitan unha partida específica destinada a produtividade (que a CIG cifra en algo máis de 500.000 euros), algo sobre o que, dixo Manuel César, a área de administración "di que non hai ningunha obrigación esixible".

"O goberno municipal está en disposición de afrontar este pago se existe un informe xurídico ou técnico que o avale", dixo o concelleiro, e que "o remanente sexa suficiente". Sobre a reclamación dos veciños de Volta do Castro, dixo que non existe "ningún procedemento de contratación" nin "ningunha obrigación comprometida", aínda que "na medida da dispoñibilidade orzamentaria tentarase ter en conta as necesidades" de todas as parroquias.

FALTA DE DIÁLOGO E TRANSPARENCIA

Na súa quenda de intervención, a edil socialista Marta Abal afeou ao goberno municipal "falta de diálogo e falta de talante" tanto cos veciños como cos traballadores do concello. "Se practicasen máis a transparencia, o orzamento xa estaría en vigor", apuntou. Así, Abal criticou que o concello "se negase a pagar a produtividade" de 2023 aos traballadores "a pesar de que había crédito" e, aínda que "os recursos orzamentarios son limitados", instou a "cubrir algunhas das reclamacións" dos veciños de Volta do Castro. Na mesma liña, Rosario Ferreiro (PP), criticou a "falta de transparencia e de claridade coa que actúa este goberno", alegando que aos traballadores "non se lles explicou" o motivo de non facer estes pagos, e que os veciños "senten enganados" pola actitude municipal.

"ACABÁRONSE AS ESCUSAS"

Na última quenda dos socialistas no debate tomou a palabra Gonzalo Muíños para eloxiar a "actitude dialogante" que tivo o PSOE neste proceso de orzamentos e para dicirlle á alcaldesa, Goretti Sanmartín, que "ten sorte", xa que "ten na oposición a un partido leal" que "puxo da súa parte" para alcanzar "un acordo precoz". "É máis do que nós tivemos no anterior mandato", afirmou.

Os socialistas, dixo, votaron a favor destas contas porque "desbloquear" estas partidas "é o mellor para a cidade", aínda que advertiu de que agora "se pon punto e final ás escusas destes nove meses", nos que o goberno local, dixo Muíños, "viviu da herdanza dos socialistas" e escudouse na falta de orzamentos para "non cumprir o que prometeu en campaña electoral".

A rexedora concluíu o debate, antes da aprobación, sinalando que este "é un bo día para os veciños de Santiago", que contarán cos orzamentos "máis grandes da historia" da cidade, con "políticas centradas nas persoas, a igualdade, os servizos públicos, a atención ao rural" e as "melloras para o conxunto da poboación". "É un día de celebración e no que, ao final, todo o tecido socioeconómico de Santiago gaña", concluíu.

Pleno do Concello de Santiago presidido pola alcaldesa, Goretti Sanmartín | Fonte: CONCELLO DE SANTIAGO