Aberto ata o 22 de abril o prazo para solicitar as axudas á incorporación de persoas de 41 a 55 anos á actividade agrogandeira

O prazo de solicitude de axudas para a incorporación de persoas de 41 a 55 anos á actividade agrogandeira continúa aberto e farao ata o 22 de abril. A liña de axudas, tal e como lembrou a Xunta de Galicia nun comunicado, está dotada con tres millóns de euros e enmárcase dentro da convocatoria que inclúe os investimentos en explotacións agrícolas (coñecidos como plans de mellora) e á integración de mozas ao sector, que no seu conxunto contan este ano cun orzamento de 47 millóns de euros.

A convocatoria destas achegas, "de gran importancia para o agro galego", publicouse o pasado día 22 de xaneiro no Diario Oficial de Galicia. Pertencen ao Plan Estratéxico da Política Agraria Común (Pepac) de España 2023-2027. O orzamento está cofinanciado nun 12 % pola Administración xeral do Estado, nun 28 % pola Xunta de Galicia e nun 60 % polo Fondo Europeo Agrícola de Desenvolvemento Rural (Feader).

Mediante estas axudas, cuxo prazo de solicitude está aberto "búscase mellorar a estrutura produtiva das explotacións galegas e avanzar na consecución dunha adecuada dimensión e un correcto equilibrio dos seus factores de produción co obxectivo de mellorar a competitividade". Ademais, apuntan, tamén se trata de alcanzar un "rexuvenecemento da poboación agraria e fomentar o emprego neste sector, con especial consideración cara ás mulleres, co fin último de fixar poboación no rural".

Concretamente, a partida asignada para sufragar investimentos en explotacións agrícolas (coñecidos como plans de mellora) é de 28 millóns (27 para as explotacións e un millón, en concreto, para as de pequeno tamaño); para a incorporación de mozas ao agro destínanse 16 millóns de euros, e aos que se lle suman os tres millóns da nova liña destinada para persoas de entre 41 e 55 anos.

Animal comiendo, animales, vaca, vacas, pastar, pasto, ganaderos | Fonte: Arquivo