Alugueres prohibitivos, disparados por enriba do 10 % no que vai de ano, ata os 8,5 euros por metro cadrado

O prezo da vivenda de aluguer en Galicia subiu un 10,7 % no primeiro trimestre deste ano en comparación co mesmo período de 2023, con 8,5 euros por metro cadrado, segundo datos de Idealista. O incremento respecto ao anterior trimestre é do 5,4 %. Os prezos soben en todas as provincias galegas, coa excepción de Ourense onde as rendas baixaron un 0,1 % durante o inverno. Entre as subidas de prezo destaca a de Pontevedra (8,5 %), seguida de Lugo (6 %) e A Coruña (3,3 %). Lugo mantense como a provincia máis barata de Galicia co metro cadrado a 6,6 euros mensuais, seguida de Ourense (6,8 euros/m2). A máis cara é Pontevedra (9,8 euros/m2), seguida pola Coruña, con 8,2 euros/m2.

Por outra banda, o prezo da vivenda en venda de segunda man subiu un 4 % no primeiro trimestre en Galicia, con prezo de 1.739 euros por metro cadrado, segundo datos de Fotocasa. O municipio no que máis subiu o prezo trimestral en marzo foi Carballo cun 20,6 %, mentres que O Grove viu descender o prezo do metro cadrado un - 10,3 %.