Cales son os seguintes pasos para que a Ribeira Sacra sexa nomeada Patrimonio Mundial?
O presidente da Deputación de Lugo, José Tomé, foi crítico coa Xunta por "non contar cos concellos para a nova proposta", aínda que destacou que "o importante é que saia adiante e que non pase como pasou hai uns anos".
Por Europa Press / Redacción | SANTIAGO DE COMPOSTELA | 08/04/2024 | Actualizada ás 19:34
O conselleiro de Cultura, Educación, FP e Universidades en funcións, Román Rodríguez, mantivo este luns un encontro con alcaldes e representantes dos concellos que forman o territorio da Ribeira Sacra cos que compartiu os seguintes pasos da candidatura 'Paisaxe da auga: Ribeira Sacra' a Patrimonio Mundial tras a decisión unánime do Consello do Patrimonio Histórico de que sexa a proposta de España para a súa remisión a Unesco.
Segundo trasladou a Consellería, no encontro, o representante do Goberno galego agradeceu a confianza e a implicación de todos os axentes locais, aos que animou a continuar avanzando "de forma conxunta e coordinada" cun horizonte claro: conseguir o máximo recoñecemento da Unesco. "Todos debemos estar orgullosos do que levamos feito porque o resultado destes anos é que a Ribeira Sacra é hoxe un territorio máis vivo, máis coidado e máis recoñecido", manifestou Román Rodríguez.
Neste sentido, explicou que, tras a aprobación do Consello de Patrimonio Histórico, a candidatura da Ribeira Sacra entra nunha nova fase na que é necesario seguir traballando "e facendo as cousas ben como ata agora para lograr a inclusión na Lista de Patrimonio da Humanidade".
"A decisión tomada polo órgano de coordinación do Goberno e as comunidades autónomas é unha moi boa noticia para Galicia porque sitúa á Ribeira Sacra de novo na fase final, pero temos por diante meses de moito traballo ata que en 2026 a proposta poida ser abordada no Comité do Patrimonio Mundial da Unesco", detallou.
Ademais, Rodríguez tamén felicitou a todos os técnicos e expertos implicados na redacción do expediente, así como aos representantes de concellos, deputacións, entidades implicadas, tecido social e empresarial e veciños "polo intenso traballo feito desde o ano 2021 para pór en valor e protexer este territorio do sur da provincia de Lugo e o norte da provincia de Ourense".
NOVA FASE DE TRABALLO
Agora, tras a decisión tomada no encontro celebrado na illa da Palma, ábrese unha nova fase de traballo na que, ao longo do ano, o equipo técnico redactor, en colaboración co Ministerio de Cultura, deberán completar o expediente desde o punto de vista formal co fin de cumprir coas directrices operativas da Unesco.
Posteriormente, o informe será presentado no Centro de Patrimonio Mundial da Unesco de París en febreiro de 2025, onde será avaliado polos órganos consultivos antes da súa valoración no Consello do Patrimonio Histórico, que ten prevista a súa sesión para o segundo semestre do ano 2026.
CRÍTICAS DE JOSÉ TOMÉ
Pola súa banda, o presidente da Deputación de Lugo, José Tomé, valorou o impacto desta declaración en termos de promoción turística e de promoción de riqueza para o territorio, argumentando que a Ribeira Sacra "non necesita ningún carné, pero este recoñecemento axuda á promoción a nivel mundial e suporía un empuxón máis de face a que sexa máis coñecida, máis visitada e mellor valorada". Con todo, segundo trasladou a institución provincial nunha nota de prensa, Tomé foi crítico coa Xunta por "non contar cos concellos para a nova proposta", aínda que destacou que "o importante é que saia adiante e que non pase como pasou hai uns anos".
