Antonio Gómez Caamaño, novo conselleiro de Sanidade: "É unha obrigación traballar por unha sanidade pública de calidade"

O conselleiro de Sanidade, Antonio Gómez Caamaño, inaugurou este venres en Santiago a XXXVII Reunión Anual da Sociedade Galega de Neuroloxía, un acto no que aproveitou para trasladar aos presentes algunhas das que quere que sexan as liñas mestras da súa xestión: o diálogo, a avaliación de resultados, a continuidade asistencial e a consecución dunha "sanidade digna" tanto para os pacientes como para o persoal sanitario.

O conselleiro comezou a súa intervención saudando aos que foron os seus compañeiros na súa vida profesional no Hospital de Santiago de Compostela e eloxiando aos profesionais de Neuroloxía, unha disciplina que "se caracteriza pola súa alta capacidade innovadora tanto na asistencia como na investigación. Para o departamento que preside, dixo, é "unha obrigación traballar por unha sanidade pública de calidade" e "orientada aos resultados en saúde". "Debemos avaliarnos, ver que facemos ben e que facemos mal e corrixir as posibles deficiencias", engadiu.

Do mesmo xeito, instou a que a continuidade asistencial entre Primaria e Especializada sexa "perfecta" e que a sanidade "se adapte ás necesidades da poboación" así como dos profesionais. Neste sentido, dixo que é necesario construír "unha sanidade digna para os pacientes e para as persoas que coidan dos pacientes". Finalmente, engadiu que o diálogo será "a principal ferramenta para mellorar as cousas".

O conselleiro de Sanidade, Antonio Gómez Caamaño, acompañado pola xerente da área sanitaria, Eloína Núñez Maside, interven no acto de inauguración dá XXXVII Reunión Anual da Sociedade Galega de Neuroloxía | Fonte: XOÁN CRESPO