Defensa da Sanidade Pública acusa ó Sergas de "escurantismo" e "trampas" nos seus orzamentos

A Asociación Galega para a Defensa da Sanidade Pública (AGDSP) acusa ao Servizo Galego de Saúde (Sergas) de "escurantismo", "falta de transparencia" e de facer "trampas" cos seus orzamentos e as contratacións despois do informe do Consello de Contas no que reclamaba un financiamento "realista" do sistema.

En concreto, este documento que transcendía o luns recollía nas súas conclusións, correspondentes ao ano 2022, que a asignación que a Xunta destina a gasto sanitario é "moi superior", uns 489 millóns de máis, á dos seus orzamentos iniciais. Ademais, os tempos de espera, en xeral, incrementáronse con respecto a antes da pandemia da covid-19.

Por mor deste informe, a Asociación para a Defensa da Sanidade Pública denunciou o "escurantismo" das contas do Sergas e sinala a "inutilización adecuada" do programa 'Imprevistos e funcións non clasificadas' que apunta Contas, empregado "para saltar os límites fixados para a transferencia de crédito". Así mesmo, este colectivo suxire que o desaxuste entre o orzamento inicial e o gasto final é "para ter as mans libres para contratar coa privada". Segundo denuncia a asociación, esta "estratexia" permite á Consellería de Sanidade "asinar contratos a dedo co sector privado vulnerando os principios de contratación pública", ademais de "incrementar as derivacións" fose do sistema público e "favorecer aos laboratorios farmacéuticos".

O Consello de Contas tamén recolle no seu informe que, en 2022, Galicia foi a décima autonomía en gasto sanitario, con 1.705 euros por habitante. Para a AGDSP, isto demostra que o orzamento do Sergas "é insuficiente", tendo en conta que a comunidade está "á cabeza en envellecemento e dispersión da poboación".

Neste contexto, a raíz do informe de Contas, a Xunta desvelou o martes que está a traballar na elaboración dun novo plan contable para a súa implementación na administración xeral, incluído o Sergas. En todo caso, xustificou que os orzamentos sanitarios eran "prudentes" e que por iso os incrementos debíanse a constantes innovacións terapéuticas e tecnolóxicas do servizo.

Centos de persoas durante unha manifestación en defensa da sanidade pública, no parque da Alameda. | Fonte: Álvaro Ballesteros - Europa Press