Así se xestou a evacuación por parte de Salvamento de Fisterra do tripulante dun barco que estaba en augas inglesas

Na tarde do pasado sábado, 113 millas ao norte da costa galega, un tripulante do buque 'Torm Innovation', con bandeira de Dinamarca, tivo un accidente a bordo: caeulle sosa cáustica nun ollo. Despois de proceder a bótarselle unhas gotas por recomendación radiomédica considerouse precisa a súa evacuación a un hospital. O curioso do caso é que a pesares de que o buque se atopaba en augas de titularidade británica, foi Salvamento Marítimo de Fisterra o que procedeu a mobilizar os medios para levar ao ferido ata o CHUAC. Por que? Falamos con Manuel Capeáns, xefe do Centro de Coordinación do Tráfico e Salvamento Marítimo de Fisterra, que nos explica por que sucedeu isto.

Como apunta, "a zona de búsqueda e rescate española abrangue ata, aproximadamente, 80 millas ao norte do Cabo Ortegal, ao longo do golfo de Vizcaya". Así, "por encima desas 80 millas cara o norte é zona de búsqueda e rescate ou ben de competencia inglesa ou ben francesa". Neste caso, polo lugar concreto onde se atopaba o 'Torm Innovation', era de competencia inglesa. Capeáns detalla que "o último porto do que partira o barco fora Copenhague, en Dinamarca, e dirixíase cara o Estreito de Xibraltar". "Foi máis ou menos cando ía pola metade do golfo de Vizcaya (golfo que se estende dende o cabo Ortegal, en Galicia, ata a punta de Pern, na Bretaña francesa), na zona de búsqueda e rescate inglesa, cando solicitou o consello radiomédico á autoridade danesa", expón.

Capeáns explica que a información que se dá a iso das 20.30 horas do sábado é que "no barco hai un tripulante, de nacionalidade filipina, cunha lesión ocular tras caerlle sosa cáustica". Entón, "o centro radiomédico danés, ademais de recomendarlle a administración dunhas gotas, recomenda a súa evacuación". Nese momento, e a pesares de que o 'Torm Innovation' está en zona inglesa e, polo tanto, serían as autoridades inglesas as que terían que poñer os medios para realizar ese rescate, "como está tanto máis preto de España, pídennos a nós colaboración, a través do Centro Nacional de Salvamento Marítimo en Madrid". España accede e, dende o Centro de Coordinación do Tráfico e Salvamento Marítimo de Fisterra procédese a mobilizar ao helicóptero Helimer 401 para realizar a evacuación.

Como explica Capeáns, "unha vez que xa sabemos que imos ir a realizar esa evacuación, dicímoslle ao barco que se desvíe cara a Coruña todo o posible, para minimizar o tempo de resposta e levalo o máis rapidamente posible á Coruña". Xa na cidade, o tripulante en cuestión é recollido por unha ambulancia no aeroporto de Alvedro que o leva directamente ao CHUAC. Aínda que semelle algo curioso, o xefe de Salvamento Marítimo de Fisterra asegura que "destas evacuacións médicas, semellantes, facemos dúas ou tres ao mes, aproximadamente, e en colaboración con outras autoridades podemos ter unhas 10 ou 15 ao ano, en colaboración coas autoridades de búsqueda e rescate inglesas, francesas ou portuguesas, as limítrofes á nosa liña de competencia".

E é que nalgunhas ocasións, por razóns operativas e polo ben dos feridos, déixanse a un lado os temas de competencias e procédese a mobilizar ao centro que mellor se considera que pode dar resposta ao suceso, xa sexa por medios dispoñibles ou por proximidade á zona. Neste caso concreto, sobre as 22.30 horas confirmouse que se realizara a evacuación do ferido do barco e que o helicóptero Helimer 401 poñía rumbo ao aeroporto de Alvedro, a onde chegou sobre as 23.00 horas, sendo trasladado dende alí en ambulancia ata o CHUAC.