Galicia rexistrou o ano pasado máis de 103.000 doazóns de sangue, case 10.000 delas de novos doantes

Galicia rexistrou ao longo do pasado ano 103.525 doazóns de sangue, das que 9.564 fixéronas persoas que doaban por primeira vez, uns resultados que sitúan á comunidade entre as comunidades máis solidarias neste índice. Os datos foron anunciados este xoves pola directora da Axencia Galega de Doazón de Sangue, Órganos e Tecidos (Ados), Marisa López, que compareceu na Comisión de Sanidade do Parlamento para responder a unha pregunta formulada pola deputada popular Raquel Arias.

Na súa intervención, a directora de Ados lembrou que Galicia conta cun 25% de poboación por encima dos 65 anos, polo que é "máis necesario" pór énfase en fidelizar aos doantes que xa participan e en captar novos. Por iso, un dos alicerces nos que traballa Ados a nivel de comunicación é o ámbito educativo, en Primaria e Secundaria, con programas de aprendizaxe e sensibilización da man da Consellería de Educación.

Ademais, tamén teñen importancia os convenios subscritos co tres universidades galegas para o desenvolvemento das campañas universitarias de doazón no sete campus galegos e "a constante interacción" co tecido empresarial galego e cos equipos deportivos galegos. Este esforzo colaborativo plasmouse o ano pasado na planificación de preto de 3.300 colectas nas unidades móbiles.

MELLORA INTEGRAL

Para consolidar estes bos resultados, explicou a directora, Ados previu continuar coa estratexia de mellora integral iniciada no 2016, que engloba aos laboratorios centrais, así como aos locais e ás unidades móbiles de doazón, onde se produce o 85% das doazóns.

Deste xeito, tras a renovación dos locais da Coruña, Santiago de Compostela, Pontevedra e Ourense, está previsto acometer melloras no acondicionamento do local de doazón do Hospital Nicolás Pena de Vigo, informou na súa comparecencia. Ademais, os orzamentos da Xunta deste ano recollen unha partida de 500.000 euros da Axencia para unha nova unidade móbil, a sexta, destinada á provincia de Lugo.

Nesta liña, a directora de Ados remarcou "o importante esforzo financeiro do Goberno galego para a renovación da frota de unidades móbiles co obxecto de ofrecerlle aos doantes a mellor accesibilidade". A renovación iniciouse no ano 2018 nas áreas de Pontevedra e Santiago, para posteriormente estenderse ás unidades móbiles de Vigo, A Coruña e Ourense, cun investimento de máis de 1,5 millóns de euros.

Marisa López engadiu que, nos próximos meses, o Goberno galego renovará tamén integramente a frota de vehículos destinados á promoción da saúde, un total de sete, un por área sanitaria, que ascenden a preto de 200.000 euros.

SEMÁFORO DO SANGUE

Coincidindo con esta comparecencia, Ados fixo públicos os datos do estado das reservas de sangue en Galicia. En concreto, están en nivel bo as reservas de sangue A positivo, AB positivo e AB negativo; e en nivel normal o resto. Non hai tipos de sangue cuxo nivel sexa baixo ou crítico.

A directora da Axencia Galega de Doazón de Sangue, Órganos e Tecidos (Ados), Marisa López.. XUNTA | Fonte: Europa Press