Ourense quédase coa metade de letrados que prestan a quenda de oficio penal debido ás malas condicións laborais

Un cento de avogados presentaron a súa renuncia a exercer na quenda de oficio de penal xeral e únense ás decenas de letrados que se apartaron deste servizo en varios partidos xudiciais galegos en protesta polas condicións nas que realizan o seu traballo. A renuncia dos avogados ourensáns supón a metade dos 200 letrados que prestan a quenda de oficio penal xeneral no partido xudicial de Ourense, no que recentemente se produciu a dimisión dos profesionais de violencia machista e á que seguirá a do "resto de quendas doutras xurisdicións".

Así o avanzou a través dunha nota de prensa o colectivo Marea Negra Ourense, que lembra a renuncia dos colexiados nos partidos de Lalín, A Estrada, Ponferrada (León) e Corcubión no marco das protestas dos letrados en demanda de melloras nas condicións da quenda de oficio. Tras adiantar que proximamente se producirá a dimisión nas áreas de asuntos civís, laborais, contencioso-administrativos, concursos de acredores e estranxeiría; o colectivo de letrados advirte que estes pasos ao carón terán consecuencias a pesares de que os colexios profesionais afirman que non será así.

"A realidade é que en Corcubión só catro letrados atenderán a quenda de oficio nos concellos de Camariñas, Cee, Corcubión, Dumbría, Finisterre, Muxía, Vimianzo e Zas. Pola súa banda, en Ourense, está a chamarse a compañeiros que non están de garda para que atendan os servizos, que comprenden os partidos xudiciais de Ourense, Xinzo, Bande e Celanova", explicou.

CSIF PIDE REFORZOS PARA OS XULGADOS DE FERROL E BETANZOS

CSIF Xustiza mantivo un encontro co presidente do Tribunal Superior de Xustiza de Galicia no que lle reclamaron reforzos para os xulgados de instrución número 2 de Ferrol e mixto de Betanzos. Sobre o caso concreto de Ferrol, que tamén leva violencia, CSIF insistiu ao presidente do TSXG "sobre a súa urxencia", dada a situación que padece, "cunha carga de traballo desmesurada".

A Central Sindical aproveitou o encontro para volver demandar unha Oficina Xudicial na prisión de Teixeiro, que segue sen ser contemplada pola Dirección Xeral de Xustiza, que propón, como solución, que se cre unha praza a maiores no Xulgado de Paz de Curtis para asumir as funcións que lle corresponderían a esta oficina.

Durante o encontro, tras revisar a situación de distintos edificios xudiciais da comunidade e reiterar a necesidade de gardas de 24 horas na Coruña e Vigo, CSIF puxo encima da mesa "as numerosas queixas que se están recibindo" sobre a utilización do expediente dixital, "pois a obrigación de usalo é para todos os colectivos, os maxistrados, fiscais e letrados tamén, non só os corpos xerais e forenses", advertiron desde a Central Sindical