Concellos ultiman o servizo de socorrismo en praias, con demanda á Xunta de ampliar axudas

Concellos galegos ultiman, ou nalgún caso xa puxeron en marcha, o servizo de socorrismo pola tempada de verán, con demanda por parte da Federación Galega de Municipios e Provincias (Fegamp) de anticipar a publicación das axudas que dá a Xunta para facilitar, afirman, a "xestión do servizo" e tamén de amplialas.

O 31 de maio, a Consellería de Presidencia, Xustiza e Deportes publicou, no Diario oficial de Galicia (DOG), a orde pola que se establecen as bases reguladoras das subvencións a concellos de Galicia para a prestación do servizo de vixilancia, rescate e salvamento en praias pero tamén noutros lugares con uso para o baño nestes meses.

Sobre a mesma, desde a Fegamp, consultados por Europa Press, lembran que o ano pasado publicouse antes, o 16 de maio. "Esa publicación tan tardía, respecto ao comezo habitual da tempada de praias en torno ao 1 de xuño, non facilita a xestión deste servizo por parte dos concellos".

"Que teñen que seguir os seus procedementos administrativos e cumprir cos prazos para formalizar a contratación directa do persoal", explican desde a Fegamp que apuntan que "esta situación está a levar a numerosos concellos a decidir externalizar o servizo a empresas do sector".

Consultados sobre a dotación destes profesionais, a Fegamp sinala que o feito de que sexan poucos meses dificulta "atopar profesionais dispostos para ser contratados que non o estean xa". Por iso, piden adiantar a publicación da orde de axudas "uns meses".

"Así como ampliar a partida económica total da orde por encima dos 1,5 millóns de euros actuais, e a contía máxima por concellos, que agora está en 40.000 euros". "A seguridade nas praias refórzase con máis recursos destinados para ter a máis profesionais e a mellorar as súas condicións laborais", inciden.

EXTERNALIZAR O SERVIZO

A externalización do servizo é unha opción pola que optou o Concello de Sanxenxo. Fíxoo xa en 2021 "porque había problemas para a cobertura", precisaron desde o consistorio sobre estes profesionais.

Ademais, inciden en que o seu obxectivo é "non perder por falta de socorristas" o seu número de bandeiras azuis, 17. "Se externalizó, profesionalizouse e contamos cada verán con 83 socorristas e sanitarios nas praias, os primeiros 14 xa empezaron en catro", sinalan sobre o fin de semana pasado e sobre un servizo que estará operativo en todos os areais en xullo.

Outro consistorio, o de Sada, afirma que optaron polo proceso de contratación d unha empresa por "os problemas que había" para conseguir profesionais, 14 neste municipio este verán. Fano fronte ao modelo de contratación directa que usaban outros anos.

Mentres, nunha cidade como A Coruña serán medio centenar de persoas as que integrarán o equipo de salvamento, socorrismo e atención médica de face a unha tempada de praias que arrincará o 15 de xuño. O pasado luns comezou a instalación das casetas destinadas ao persoal, que atenderá os areais coruñeses, con cinco bandeiras azuis.

FORMACIÓN

Pola súa banda, a presidenta da Federación de Salvamento e Socorrismo de Galicia, Nuria Rodríguez, asegura que non hai un dato oficial de cantos socorristas haberá este verán xa que o número depende de cada concello.

"Non vai haber tantas vacantes como outros anos", aclara. Faino despois de que haxa dúas maneiras de traballar como tal, mediante un certificado de profesionalidade oficial que vale para toda Europa ou outro que só vale para Galicia.

Tamén afirma que a nova normativa autonómica coas subvencións existentes e a posibilidade de contratar empresas externas, en lugar de ter que facer a contratación de forma directa, facilitou aos concellos esta actuación.

Praia en Sanxenxo. CONCELLO DE SANXENXO | Fonte: Europa Press