Máis de 11.500 prazas para mozos galegos en campamentos, voluntariado e intercambios este verán

A Xunta de Galicia ofrece máis de 11.500 prazas en todas as actividades contempladas da campaña 'O teu mellor verán' para os mozos galegos e que inclúe campamentos, campos de voluntariado, intercambios con outras comunidades e mini campamentos. Así o apuntou a directora xeral de Xuventude, Lara Meneses, que compareceu este venres ante a Comisión de Educación e Cultura do Parlamento para informar as actividades para os mozos en período estival.

"Esta campaña segue sendo un referente a nivel de todo o Estado, ofrecendo unha atractiva programación que a converte en destino preferente para os mozos galegos e para os doutras comunidades, aos que se lles facilita un recurso de lecer educativo de primeiro nivel", sinalou. Ademais, trátase dun "importante" recurso de conciliación para as familias e "un elemento dinamizador do emprego no sector do tempo libre".

Así, baixo o lema 'O teu mellor verán', a programación de actividades comprende os campamentos en Galicia, o programa de intercambios bilaterais con outras comunidades autónomas, os campos de voluntariado en Galicia, noutras comunidades e no estranxeiro, o programa 'Conecta con Galicia' para mozos galegos do exterior, o programa mini campamentos 'Coñece Galicia', de cinco días de duración.

En canto aos campamentos, mediante a programación dos campamentos de verán, "brindarase a posibilidade de que mozos galegos, con idades comprendidas entre o nove e os 17 anos, empreguen o seu tempo libre estival participando en actividades de educación non formal moi diversas, de carácter cultural, ambiental, deportivo, de tempo libre que serven non só para divertirse, senón tamén para o seu enriquecemento persoal e vital".

Un total de 7.611 prazas para campamentos en 36 instalacións que se poñen a disposición dos mozos nas catro provincias galegas. A estas súmanse 250 prazas nos campamentos específicos para persoas con discapacidade e ás 155 nas residencias de tempo libre de Carballiño e de Panxón. Ademais, a oferta inclúe ao redor de 300 prazas de intercambio noutras comunidades, o que permitirá a convivencia dos mozos galegos con outros de Euskadi, de Estremadura, de Castela-León, de Castela-A Mancha, da Rioxa e de Cantabria.

MINI CAMPAMENTOS 'COÑECE GALICIA'

Outra das actividades para este verán son os mini campamentos 'Coñece Galicia', unha iniciativa lúdico-formativa que se desenvolve en aloxamentos turísticos distribuídos por toda a xeografía galega en estancias de cinco días, de luns a venres. "Esta actividade nace coa idea de poder ofrecer a todos os habitantes de Galicia, a todos aqueles mozos que quedaron sen praza nos campamentos na convocatoria xeral, unha oportunidade que lles damos, máis curta, de poder conseguir unha praza nestas actividades", explicou.

O programa suma 700 prazas, con 34 quendas de participación nos meses de xullo e agosto, distribuídos nun total de 14 programas e instalacións diferentes. Cada quenda conta con 18, 20 ou 25 prazas, segundo o programa. Incorpóranse concellos como o de Palas de Rei, Ribeira de Piquín e Tomiño. Está dirixido a nenos empadroados en Galicia que teñan entre nove e 14 anos. Todos os programas teñen un custo total de 125 euros, sen contar os descontos aplicables. Por último, sinalou que outra das novidades é que as actividades inclúan a mozas de ata 30 anos, "dando resposta a unha demanda da mocidade nos últimos anos".