E ti, onde vas celebrar o San Xoán? Estes son os 15 concellos galegos nos que é festa obrigada

Para celebrar o San Xoán como é debido non precisas irte á cidade da Coruña, aínda que sen dúbida sexa esta a zona onde se celebra máis por todo o alto. Pero tamén son moitos os concellos galegos que organizan as súas propias queimadas e prenden lume a cacharelas. E nas grandes cidades galegas son os propios barrios os que argallan a troula da noite máis curta do ano para os veciños. A variedade está servida e, para que poidas escoller o San Xoán que che quede máis a man, aquí che deixamos un listado cunha variedade ben grande de ofertas culturais. O que todas teñen en común, iso si, é a sardiñada, a churrascada, a cacharela e a queimada, como non podía ser doutro xeito!

Queimada | Fonte: Arquivo

• A CORUÑA: Había que comezar, por suposto, pola cidade herculina, onde o culto ígneo na noite solsticial vívese con grande intensidade, tentando alonxar coas fogueiras os maleficios. Dende Os Castros ata Monte Alto, dende Palavea ata Agra do Orzán, na zona de Eirís e tamén nos Mallos, organízanse fogueiras ou sardiñadas comunais para festexar a noite máis curta do ano que abre as portas ao recén estreado verán. Tal é a súa relevancia que esta festa foi declarada de Interese Turístico Internacional. Os festexos na cidade comezarán xa o sábado ás 18.45, cando terá lugar unha homenaxe a Emilia Pardo Bazán, Teresa Herrera, Juana de Vega e Concepción Arenal. Ás 20.00 horas homenaxearase a María Pita e ás 20.30 terá lugar o concerto da Banda de Música. Xa o domingo, ás 10.45, levarese a cabo a homenaxe ao rei Alfonso IX, ás 11.45 a homenaxe ao brigadier Diego del Barco e ás 12.30 sairá a comitiva das meigas 2024. Ás 12.45 terá lugar a Salve a Nosa Señora do Rosario, ás 13.00 producirase a homenaxe a María Pita e ás 13.45 levarase a cabo o aceso e bendición do lume de San Xoán na igrexa castrense de San Andrés. Ás 19.00 a praia de Riazor acollerá as fogueiras de San Xoán. Ás 23.50 horas terá lugar un espectáculo de fogos de artificio. Ás 00.00 procederase á queima da falla e ás 00.15 poderase desfrutar dun gran concerto.

• SARRIA: Tamén esta localidade lucense celebra o seu San Xoán con música pola rúa, actuacións musicais e fogueira. Dende o sábado haberá pasarrúas pola tarde coa asociación Peleiriños e charanga Louband. Ás 20.00 horas actuacións musicais de Louband, Ultramarinos e A Duendeneta en vía Castelao. Tamén cea americana coa Sociedade Recreativa A Unión e verbena coa orquestra Tokio. Ás 23.15 horas actuación de Niña Polaca na vía Castelao e ás 01.00 horas festa-verbena coa orquestra La Fórmula no mesmo lugar. Pola súa banda, o domingo ás 21.30 horas haberá pancetada popular no campo da festa e ás 22.30 horas actuación de Eoas. Ás 23.00 LII Queimada Popular e ás 00.00 aceso da fogueira de San Xoán no campo da festa. Ás 00.30 horas verbena coa orquestra New York en vía Castelao. 

• SANTIAGO: A capital galega acollerá unha nova edición das Festas de San Xoán o próximo domingo 23 que terá o seu punto central na praza de Mazarelos, aínda que tamén os barrios, como o de Amio, Angrois ou Conxo, se encherán de vistosas e máxicas cacharelas, onde os veciños e visitantes poderán degustar sardiñas asadas acompañadas de pan e viño. A festa no centro da capital estará precedida de diversas actividades e obradoiros sobre os ritos e tradicións galegas do solsticio de verán. Dende as 10.00 horas haberá pasarrúas de A.C. Argalleiros e A.C. Pena Maior de Marrozos. Ás 11.00, 12.00 e 13.000 impartiranse obradoiros. Ás 16.00 comezará o pasarrúas de A.C. Argalleiros e A.C. Pena Maior de Marrozos e dende as 17.00 terán lugar máis obradoiros. Ás 19.30 comezará o Take&Go de herbas de San Xoán e ás 20.30 poderase desfrutar da Noite Máxica co Mago Marcos. Ás 21.30 horas terá lugar a actuación de Cantigas e Agarimos e ás 22 levarase a cabo o conxuro da queimada coa posterior degustación. Ás 22.15 comezará a foliada aberta con Cantigas e Agarimos. Os paseos botánicos para a recollida de herbas de San Xoán levaranse a cabo entre as 10.00 e as 11.30 e entre as 16.00 e as 17.30 horas.

• FERROL: A festa na cidade de Ferrol tamén se reparte por varios puntos, entre os que destacan a propia praza de San Xoán e barrios como o de Canido, Esteiro, Filgueira e Esmelle. Este ano, en Filgueira o sábado os actos da festa comezarán con dianas e alboradas con gaiteiros e ás 14.00 terá lugar a sesión vermú co dúo Maracaibo, a partir das 19.00 a popular gran sardiñada e as actuacións do grupo Carpe Diem e a orquestra Finisterre; e o domingo ás 13.00 oficiarase a misa solemne seguida de procesión para logo dar paso a fogos de artificio e á sesión vermú co dúo Estrellas, xa pola tarde ás 19.00 haberá pasabares coa batukada Retumbatuke e ás 22.00 horas a verbena co dúo Estrellas e a orquestra Panamá. Ás 00.00 horas terá lugar a tradicional luminaria de San Xoán e, a continuación, a 'Queima da bruxa', seguida da queimada popular. Despois, actuación de Kiko Rivera. No caso do barrio de Canido os actos comezarán ás 13.00 e comprenderán sesión vermú e tardeo con música de Romalde & Sobrin, Óscar Fojo e Brixta, degustación de liscos e DJ con Marqués de Vilapodre e Suso Manchita. En Esmelle, pola súa banda, o sábado haberá dende as 22.00 liscos e festa con La Mecánica e dúo Karamba; e o domingo ás 14.15 sesión vermú co grupo Jaque e xa pola noite prenderase a cacharela dando logo paso á verbena a cargo do grupo Jaque e a orquestra Olympus. E no barrio de Canido os actos comezarán o domingo ás 13.00 horas e estarán conformados por sesión vermú e tardeo con música de Romalde&Sobrin, Óscar Fojo e Brixa, degustación de Liscos e DJ Marqués de Vilapodre e Suso Manchita.

• VIGO: Ademais das fogueiras nas praias do concello, o municipio celebra a súa XL Carreira Nocturna de San Xoán o domingo 23 a partires das 21.00 horas. A carreira, de 7,7 quilómetros de percorrido, terá o seu punto de saída na praza do Rei, mentres que a meta estará ubicada na praza do Berbés. O prezo da inscrición será de 10 euros. Tamén terá lugar a festa de San Xoán na parroquia de Valladares, onde o sábado ás 20.00 actuará, para os máis pequenos, actuará Uxía Lambona e a Banda Molona e, xa pola noite, haberá verbena co trío Soprano e La Banda de Ayer. O domingo ás 13.00 oficiarase a misa maior. A Unión Musical de Valladares animará o pasarrúas e ofrecerá un concerto. Ás 17.00 haberá cucañas e ás 20.00 terán lugar as actuacións dos grupos Cantareiras Bouzacoba, Gaitas Os Tabáns, Baile Vai na Herba e Operación Karuncho. Haberá sardiñas e churrasco ás 00.00 horas e unha gran fogueira e verbena amenizada por Va de Retro e Taitantos. No barrio de Bouzas a noite do sábado haberá sesión DJ na Alameda Eduardo Cabello a cargo de Parde LP e o domingo ás 00.00 terá lugar o aceso da fogueira. Na parroquia de Beade o San Xoán celebrarase o sábado e arrancará ás 21.00 cunha gran sardiñada amenizada por grupos folclóricos e a tradicional fogueira acesa. No Casco Vello da cidade tamén o día 22 haberá unha gran sardiñada amenizada por DJ Xavi PetardPop. Tamén no barrio de Lavadores, dende as 18.00 horas do sábado haberá sardiñas, choripáns, filloas, foliada con gaiteiros e queimada teatralizada. En Saiáns ese mesmo sábado dende as 22.00 haberá sardiñada amenizada por A Polémica Banda dos Bechuchos e gaiteiros. E no barrio do Berbés os actos de celebración comezarán o domingo ás 21.00 con música das Punk-deretas, seguida ás 21.30 horas da música dos Ferraias da ETEA. Tras a carreira nocturna, ás 22.00 impartirase un obradoiro de danzas do mundo e ás 22.30 sairá o akelarre. Ás 00.00 comezará a animación musical dos gaiteiros e o akelarre culminará co aceso da fogueira de San Xoán.

• NIGRÁN: Nas Rías Baixas existen dous lugares que son emblemáticos para dar a benvida ao verán na noite máis curta do ano: Praia América e Panxón. En ambos os areais a escuridade ilumínase de fogueiras mentres soa, de fondo, música de verbena. No caso da parroquia de Panxón, este ano animará a festa a orquestra Solara.

• CARBALLO: A festa de San Xoán é unha das máis importantes da vila. O sábado ás 13.00 horas comezará o Festival Rockin' coa actuación, durante a sesión vermú, de Sofía Comas y TT Syndicate. Ás 19.00 horas actuarán as formacións Hongo, Rusty Nuts, Ian Kay, The Shivas y Dr. Explosión. Ás 23.00 a orquestra Los Players animará a verbena. O domingo ás 21.00 prenderase a Cachela de San Xoán con sardiñada e churrascada popular e verbena co grupo Galia. A partir das 00.00 horas procederase á Queima da Cacharela e ás 00.30 haberá sesión DJ con Sara Pose e Fran Stone.

• POIO: Son as festas patronais da localidade. Ás 10.00 horas do sábado haberá alboradas polas parroquias coa Escola de Música Tradicional de Poio e Vides Novas. Ás 21.00 horas pregón de San Xoán, entrega de premios do concurso de carteis de San Xoán e recoñecemento deportistas temporada 23-24, así como lectura do pregón a cargo de Rafa Carballeira, actuación musical trío Arena e desgustación de viño e rosca. O domingo ás 12.45 horas concerto da Escola de Música de Poio. Ás 17.00 horas recollida das herbas de San Xoán, ás 21.30 sardiñada popular e ás 22.30 horas verbena con Los Players. Ás 23.30 horas espectáculo de lume e prendido da fogueira de San Xoán.

• MUROS: Festas na honra de San Xoán, a Virxe do Carme e San Antonio na parroquia de Serres. O sábado ás 19.00 horas comezará a I Andaina do Cachón e pola noite actuarán a orquestra Costa Dorada e a disco móbil CDC. O domingo 23 ás 22.00 horas comezará a gran sardiñada que dará paso á verbena con Pili Pampín e a disco móbil Elation.

• VILAGARCÍA: Os festexos comezan no barrio das Pistas, ás 22.00 horas, cunha gran sardiñada e churrascada que dará paso, unha hora despois, ás 23.00 horas, ao comezo do Festival de San Xoán coa orquestra Marbella e os DJ's Dumore, Mike Martín e MRJ Rubén Rey. Tampouco faltará nesta cita a tradicional fogueira para purificar a noite. Tamén haberá San Xoán en Rubiáns con churrascada e chourizo máis pan a 5 euros e con sardiñas e pan a 3 euros a partir das 22.00 horas. 

• O GROVE: A praia da Lanzada vive unha das tradicións máis antigas: o rito das noves ondas. Durante a posta do sol, quenes desexen curar o 'meigallo', ter saúde ou descendencia, ou espantar aos espíritos, deberán bañarse no Atlántico e saltas as nove ondas. Tamén na praia de Porto Meloxo, na mesma localidade, o domingo haberá San Xoán. Os asistentes poderán degustar dende as 19.30 horas sardiñas, churrasco, empanada e criollos e desfrutar coas actuacións musicais de DJ Anxo Silva, Assonak e A Banda do Sequío.

• VIVEIRO: Un dos segredos mellor gardados da primeira festa do verán na Mariña lucense atópase nunha pequena parroquia de Viveiro: o San Xoán de Covas. Os festexos prolónganse durante toda a fin de semana, comenzando o sábado pola tarde cunha gran foliada popular a partir das 20.00 horas. Xa o domingo, ás 14.00 horas, haberá sesión vermú coa orquestra Trébol e ás 23.00 horas verbena coa citada orquestra Trébol e o grupo Zona Zero. Ás 00.00 horas prenderase a gran lumeirada de San Xoán.

• OURENSE: A Asociación Cultural A Galleira de Ourense celebrará o Lume Novo a partir das 18.30 horas coa actividade Colheita de Sam Joám coa saída do ponte medieval do Lonia, onde se aprenderá a identificar as plantas menciñais. Ás 21.30 horas poderanse degustar sardiñas (opción vegana), pan e queimada a un prezo de 5 euros para os socios e de 8 para os non socios, e haberá foliada aberta e degustación de queimada. E tamén en Castro de Beiro haberá queimada, sardiñada, churrasco, criollos e viño no campo da festa, pero neste caso a festividade de San Xoán adiantarase un día, ao sábado. 

• LUGO: O San Xoán das Gándaras chegará o domingo con actuacións musicais durante todo o día por parte de Tetén!, Jairo L.Q, Culmeiras DJ e DJ Paykas. Ás 13.00 horas terá lugar a sesión vermú e ás 20.00 a churrascada veciñal. Xa ás 22.45 procederase ao prendido da fogueira. Tamén haberá o San Xoán na parroquia de Orzabai, onde a cea terá lugar ás 21.00 horas con sardiñas, liscos, perriños, larpeiradas e queimada. Logo virá o concerto en directo de Verónica Cambón. Na parroquia de Tirimol o sábado ás 13.30 oficiarase misa solemne en honra ao Santo e, ao finalizar os actos relixiosos, haberá sesión vermú a cargo do grupo Alaska, así como verbena pola noite con este mesmo grupo e o dúo Estrellas. Xa o domingo a xornada festiva comezará ás 13.30 con misa solemne seguida de sesión vermú co dúo Epo-k. Na parroquia de Campo tamén haberá o sábado ás 13.30 horas misa solemne en honra ao Santo e, ao finalizar, sesión vermú a cargo do grupo Trébol, formación que tamén amenizará a verbena da noite. O domingo ás 13.30 volvera haber misa, dando paso a sesión vermú a cargo do dúo Eclipse, e xa pola noite gran verbena de fin de festas coa orquestra Los Satélites.

• SANXENXO: O domingo na parroquia de Nantes haberá festa relixiosa e pola mañá unha gran tirada de fogos anunciará o comezo dos festexos. Xa pola noite haberá sardiñada e churrasco acompañados polo dúo Reflexos. Na parroquia de Noalla a festa comezará o domingo pola tarde con pasarrúas por Adina, Portonovo e Noalla a cargo do grupo Os do Barro. Pola noite terá lugar unha gran sardiñada e churrascada ambientada coa popular fogueira de San Xoán, amenizada por JJ Compota.

Centos de persoas fronte a unha fogueira na Noite de San Xoán, a 23 de xuño de 2022, na Coruña | Fonte: M. Dylan - Arquivo