Por que investiga a xuíza de Lara o Concello de Pontevedra?
Vixilancia Aduaneira sospeita do pago de excursións escolares en Pontevedra. Os axentes investigan porque se desagregou o prezo de 17 desprazamentos en autobús de alumnos de colexios locais á estación potabilizadora na parroquia de Lérez. Tamén as xuntanzas que mantivo o alcalde e cargos do BNG con representantes de Aquagest-Viaqua.
- Lores admite o xantar cos directivos de Aquagest e pídelle celeridade á xuíza
- A chamada do tesoureiro do BNG á empresa da Pokemon de parte de Lores
Por Galicia Confidencial | Lugo | 14/11/2015 | Actualizada ás 10:58
Este mércores, e por espazo de máis de 15 horas, axentes do Servizo de Vixilancia Aduaneira (SVA) estiveron rexistrando o Concello de Pontevedra na procura de documentación relativa a varios contratos sospeitosos cuxa orixe está na Operación Pokemon, sobre todo, os relativos á empresa de autobuses Viuda de Cándido, que ao contrario que Aquagest –hoxe Viaqua--, non tiña presenza no resto do sumario.
Precisamente, foi a xuíza Pilar de Lara, titular do Xulgado de Instrución 1 de Lugo, a que ordenou estes rexistros. Os axentes ven, agora, sospeitas sobre o pago de excursións escolares en Pontevedra na investigación da peza separada sobre Aquagest da operación Pokemon. A conexión, segundo o informe da SVA, atópase nos orzamentos de transporte da empresa, remitidos desde o correo dun traballador do Concello a Casimiro G.F., xerente da empresa de augas en Pontevedra. Neles desagrégase o prezo de 17 desprazamentos en autobús de alumnos de colexios locais á estación potabilizadora na parroquia de Lérez en novembro de 2010.
No informe remitido polos axentes á xuíza, os axentes se centran nas reunións do alcalde, Miguel Anxo Fernández Lores, con representantes de Aquagest en Santiago e do concelleiro de Facenda, Raimundo González, co responsable en Galicia de Vendex, José María Titor, con motivo dun partido de baloncesto entre o Obradoiro e o Real Madrid en marzo de 2012. O encontro con Lores, en maio de 2012, consiste nunha comida con directivos de Aquagest en Santiago de cuxo contido fala un deles, Henry L., cun empregado esa mesma tarde, horas antes, segundo o propio Henry, dun encontro co vicepresidente da Xunta, Alfonso Rueda.
Lores insistiu este xoves en que o contrato con Aquagest precedía ao seu mandato e expira en 2017, pero admitiu que houbo "actualizacións dos prezos contractuais", tachando os vínculos sinalados de "batiburrillo". A reunión co rexedor foi seguida semanas despois doutra do exxerente do BNG Xosé G. con Henry L. "para falar do asunto que falastes os dous", en referencia ao rexedor.
O informe sinala a un cargo político máis, o edil de Rural e Servizos até 2011, José Manuel Valcárcel, que asistiu a un partido de fútbol entre o Barcelona e o Real Madrid con Casimiro G.F. con entradas conseguidas por este último a través da empresa e que declarou a 'Diario de Pontevedra' que o viaxe o fixeron xuntos pero que o pagaron a medias.
Os demais sinalados son funcionarios municipais, que figuran en viaxes pagas pola matriz de Aquagest, Augas de Barcelona (Agbar), a funcionarios da área técnica do Concello, un dos cales sae tamén como probable comprador dun Citroën C5 de 130.000 quilómetros que usaba Casimiro G.F., a través dun contrato de Leasing de Aquagest.
