Os hospitais galegos acollerán 14 talleres de robótica para "humanizar a estancia" dos menores ingresados
Están pensados para desenvolverse en grupo e favorecer a interacción social.
Por Europa Press / Redacción | SANTIAGO DE COMPOSTELA | 25/06/2024 | Actualizada ás 14:52
O conselleiro de Sanidade, Antonio Gómez Caamaño, e o presidente do Colexio de Enxeñaría en Informática de Galicia, Fernando Suárez Lorenzo, asinaron este martes un convenio de colaboración para a posta en marcha de talleres de robótica e programación destinados a nenas e nenos hospitalizados, co obxectivo de "humanizar a súa estancia" nos centros hospitalarios.
En total, desenvolveranse 14 talleres, dous por cada área sanitaria, nos que están previstas actividades como transformar froitas e utensilios de cociña en mandos de xogos de computador; ou probar robots con forma de coche ou mascota que cambian o seu comportamento en función do son ambiental, da luz ou da distancia a outros obxectos grazas a sensores integrados.
Desta forma, tal e como dixo o conselleiro, este convenio asínase coa vontade de que estas actividades sexan unha distracción positiva para os nenos ingresados, contribuíndo á súa recuperación emocional e mental.
Na mesma liña, o presidente do Colexio de Enxeñaría en Informática de Galicia indicou que os talleres permitirán utilizar elementos non tecnolóxicos para coñecer as leis da física e da informática, como é a condutividade.
Con estas actividades interactivas e prácticas proporcionarase "unha distracción positiva" da situación médica de cada paciente, contribuíndo a "facer o ingreso hospitalario máis levadío, xa que a hospitalización é unha fonte de tensión para os mozos e para as súas familias".
Os talleres están pensados para desenvolverse en grupo e favorecer a interacción social, aínda que tamén están previstas sesións virtuais no caso de pacientes que non poidan participar fisicamente nos xogos. Os talleres serán impartidos por empresas galegas do ámbito tecnolóxico a través dos seus plans de responsabilidade social corporativa e, para poder levalos a cabo, o Sergas destinará 11.500 euros á adquisición do material necesario.
