O sindicato CESM celebra a especialidade de Urxencias e reclama ao Sergas melloras de horario e retribucións

O Sindicato Médico de Galicia (Simega), adscrito á Confederación Estatal de Sindicatos Médicos (CESM), celebra que este martes o Consello de Ministros aprobase o decreto que crea a especialidade de Medicina de Urxencias e Emerxencias, e esixe ao Servizo Galego de Saúde (Sergas) que negocie xa reducións de horario e subidas retributivas para estes profesionais.

A través dun comunicado, Simega subliña que estes médicos loitaron contra a pandemia "en primeira liña" e mantiveron o seu horario de traballo as 24 horas ao día sete días á semana. Por iso, "é de xustiza" aplicarlles as melloras pactadas o abril de 2023 para o resto de facultativos do Sergas.

Entre eles, subidas do complemento de turnicidade e de atención urxente un 7,9 e un 15,61 por cento, respectivamente, así como unha redución da xornada laboral ata as 1.381 anuais, "sen superar nunca a media das 175 horas ao mes" que establece o convenio do ano 2007 que regula as condicións de Urxencias no Sergas.

Así mesmo, Simega reclama unha revisión da hora complementaria, que desde hai 17 anos non experimentou subidas, e propón que se cre un complemento de dispoñibilidade voluntario para cubrir as incidencias de última hora que acaban facendo os facultativos na súa quenda ordinaria "por falta de persoal".

ENFERMARÍA

Por outra banda, tras case 20 anos desde a aprobación das especialidades, e tras a aprobación da nova especialidade de Urxencias e Emerxencias en Medicina, o Consello Xeral de Enfermaría (CGE) considera "imprescindible" que desde o Ministerio de Sanidade e as comunidades autónomas se desenvolvan as actuais especialidades de Enfermaría e aquelas novas especialidades de enfermaría que sexan necesarias, entre as que podería incluírse a de Enfermaría de Urxencias e Emerxencias.