O 75% dos centros galegos públicos e concertados darán ata un terzo das horas en lingua estranxeira
A Escola de Canteiros de Poio pasará a ser un centro integrado de FP con 92 prazas ofertadas.
Por Europa Press / Redacción | SANTIAGO DE COMPOSTELA | 08/07/2024 | Actualizada ás 18:59
A porcentaxe de centros educativos galegos públicos e concertados que participan en programas de plurilingüismo, que inclúe --entre outras medidas-- a impartición de ata un terzo do horario lectivo en lingua estranxeira, crecerá ata o 75% co novo curso 2024/25.
En total, serán 511 os colexios e institutos que a partir de setembro acolleranse a esta iniciativa, segundo un informe analizado este luns na reunión semanal do Goberno galego e do que deu conta o presidente, Alfonso Rueda.
En concreto, serán 250 os centros que imparten plurilingüismo en Infantil --tres veces os que había no curso 2010/11, cando arrincou o programa--, 460 en Primaria e/ou ESO, máis outros 15 en Bacharelato.
Todo isto son datos provisionais, xa que aínda non concluíron os prazos para a adhesión de centros de FP --o curso pasado, foron 26 os que participaron no programa--, así como as escolas de arte e superiores de deseño --ata agora foron dous, a da Coruña e Lugo--.
Alfonso Rueda destacou que, para facilitar o desenvolvemento do proxecto, a Xunta habilita diferentes iniciativas como os auxiliares de conversación, que o próximo curso aumentarán a 665, entre outras.
ESCOLA DE CANTEIROS DE POIO
Así mesmo, o Goberno galego aprobou este luns converter a Escola de Canteiros de Poio nun centro integrado de Formación Profesional (CIFP), que estará especializado no sector da edificación, a construción e a cantaría. Este paso "reforza", en palabras de Rueda, a rede de CIFP de Galicia, á vez que permite oficializar a formación que ofrecía esta escola que o ano pasado foi traspasada da Deputación de Pontevedra á Xunta.
O centro impartirá a partir de setembro un curso de alta especialización en pedra natural, un ciclo básico en Reforma e Mantemento de Edificios, e dúas FP Dual en Construción e en Proxectos de Edificación. En total, o próximo curso ofertaranse 92 prazas co obxectivo de, ano a ano, ir aumentalas ata superar as 300.
Ademais, o presidente da Xunta avanzou que o novo CIFP abrirá a posibilidade de que antigos alumnos da Escola de Canteiros poidan homologar a súa titulación, que antes non tiña carácter oficial.
