Mercadona adquire o 30% da galega Grupo Malasa, unha multinacional do mobiliario
O cofundador Antonio Pérez Patiño deixa o grupo de fabricación de mobiliario con sede en Cerceda.
Por Europa Press / Redacción | Compostela | 10/07/2024 | Actualizada ás 11:21
Herrecha Inversiones, sociedade patrimonial propiedade da vicepresidenta de Mercadona, Hortensia Herrero, entrou no accionariado do galego Grupo Malasa, empresa con sede en Cerceda, dedicada á fabricación de mobiliario a medida en España e Europa, tras a saída do cofundador Antonio Pérez Patiño e do fondo de investimento GPF.
A empresa foi fundada polos irmáns Javier e Antonio Pérez Patiño hai 30 anos como unha pequena ferraxaría situada na costa da Tapia, en Cambre, que foi crecendo "con éxito" ata lograr na actualidade unha "gran carteira" de clientes, entre os que se atopan recoñecidas multinacionais do retail e a hostalaría, segundo informou Marina de Empresas nun comunicado. Actualmente, a súa sede atópase no municipio coruñés de Cerceda.
En 2018, froito do crecemento que experimentara a empresa, as familias propietarias venderon unha participación minoritaria ao fondo de investimento GPF, que acaba de vender o seu paquete accionarial tras unha etapa de seis anos de relacións comerciais "moi frutíferas". Esta substitución no capital da multinacional coruñesa coincidiu tamén coa saída do accionariado do maior dos irmáns, Antonio, que se dedicará a actividades alleas á empresa nunha nova faceta profesional.
Neste escenario entrou como novo socio comercial Herrecha Inversiones cunha participación minoritaria do 30 por cento, mentres que a maioritaria pertence a Javier Pérez Patiño. Á fronte das operacións e das decisións de Grupo Malasa manterase Javier Pérez xunto coa nova xeración da familia, co que se realiza así a substitución que leva xestándose nos últimos anos.
Desde a compañía asegúrase que, para os seus máis de 1.000 empregados, situados entre España e México, e os seus máis de 90 clientes, a substitución de accionistas "non suporá ningún cambio na actividade, que continúa asentada igual que durante os últimos 30 anos". Con esta nova configuración, o grupo empresarial "busca novos retos e potenciar o crecemento que levan experimentando nos últimos anos da man de Herrecha Inversiones", á vez que transmite o "profundo agradecemento" á figura de Antonio Pérez e a GPF.
