O concello de Ourense non autoriza un evento solicitado polo BNG ao sospeitar que podería tratarse dunha protesta
Alegan que a solicitude podería ser "un ardiz para que se autorice un concerto de grupos que demanda a apertura do espazo" Lusquiños.
Por Europa Press / Redacción | OURENSE | 11/07/2024 | Actualizada ás 17:17
O goberno municipal de Ourense anunciou a denegación dunha solicitude de autorización para a ocupación do espazo público, o próximo día 15 de xullo, pedida polo grupo municipal do BNG "por non axustarse á normativa de utilización de espazos públicos". Así o esgrimen nun comunicado no que explican que os nacionalistas solicitaran a ocupación de espazo público para a celebración dun evento baixo o título 'free lusquiños' o próximo día 15 de xullo.
Desde o consistorio sinalan que "sospeitan" que a solicitude podería ser "un ardiz para que se autorice un concerto de grupos que demanda a apertura do espazo", sendo esta unha actividade que, din, "non é autorizable de acordo coa normativa municipal". O propio rexedor municipal, González Pérez Jacome, explica que a Rúa do Paseo "non é un espazo adecuado para actividades que supoñan unha gran concentración de xente", e manifesta que estes eventos "deben ser derivados a parques ou prazas da cidade como xa ocorre con feiras como a da artesanía ou a do libro e outras de similares características".
A maiores detalla o alcalde que "este é o criterio que vimos mantendo desde hai tempo, a través dunha providencia que establece os criterios para a autorización nas zonas máis transitadas da cidade e nas vías de tránsito peonil preferente". Por iso mesmo, Jácome critica que "parece mentira" que un partido institucional como o BNG, que "tivo responsabilidades de goberno municipal recentemente e coñece perfectamente a normativa vixente", utilice esta clase "de trampas" para que se autorice un evento cuxas características "non concretan".
Neste sentido afirma que "sería unha temeridade", porque ao non explicar que se trataría dun concerto "non se poderían activar as medidas de seguridade organizativas que requiriría" dita actividade. Pola súa banda, desde o BNG municipal aseguran que "é rechamante" que se fale de normativa de utilización de espazos públicos, porque aínda que é certo que as distintas feiras recolocáronse noutras localizacións, "a Rúa do Paseo albergou aínda non fai moito o Rally de Ourense".
Nesta liña din que noutras ocasións solicitaron espazos públicos para actos doutro tipo sen que supuxese un problema, e sen recibir unha denegación, "como moito unha explicación de que era mellor outra localización por parte do protocolo de seguridade". "Pediramos dez metros cadrados e para cinco horas de 17.00 da tarde a 22.00 da noite, cunha infraestrutura mínima, non pediamos máis", explican os nacionalistas, que sinalan que eles non se atopan detrás do acto en si, senón que tras manter unha reunión cos usuarios do Espazo Lusquiños, que permanece pechado, estes pediron que presentasen esa autorización para celebrar pequenos concertos rotatorios para pedir a reapertura do espazo.
"A verdade é que nos sorprendeu a resposta e tamén que se fale de temeridade por unha gran concentración de xente, cando no último pleno, cando debatemos a apertura do espazo, o propio alcalde dixo que era innecesario porque apenas o usaba ninguén", responden desde a formación.
