Cartelazo para o 'Revenidas Miúdo' o 28 de xullo no Monte do Gozo
Será a 2ª edición e a organización vén de adiantar que contará, entre outros, con Uxía Lambona e A Banda Molona, A Gramola Gominola, Brais das Hortas, Peter Punk e Pakolas e Laura Romero.
Por Galicia Confidencial | Santiago de Compostela | 20/07/2024 | Actualizada ás 10:00
A falta de outras importantes confirmacións, que se darán a coñecer en vindeiras datas, o Revenidas Miúdo anuncia xa que o domingo 28 de xullo contará coa presencia no Monte do Gozo de Uxía Lambona e A Banda Molona, que repiten respecto á primeira edición; A Gramola Gominola, co seu espectáculo As que máis molan da Gramola; o Concerto PunkInfantil, de Brais das Hortas e Perter Punk; e Pakolas e Laura Romero, que presentarán Cores, Contos e Rock coa Ramona pequena.
No recinto do festival realizaranse, ademais dos concertos, diferentes obradoiros, haberá unha zona xogos populares, espazos lúdicos e outras moitas sorpresas.
O Revenidas Miúdo contará tamén este ano con un mercado creativo. As persoas ou colectivos que desexen formar parte deste mercado poden solicitar a súa inscrición no correo electrónico mercadocreativo@revenidas.com.
O Revenidas Miúdo, un evento que naceu o ano pasado cun espírito de romaría diúrna de carácter familiar e que congregou a máis de 3.000 asistentes, celébrase en colaboración coa Xunta de Galicia-Turismo de Galicia e Deleite.
A entrada ao Revenidas Miúdo é de balde.
