Os concellos galegos preparan a acollida duns 470 migrantes a partir do 25 de xullo
A previsión é que cheguen a Santiago, Becerreá, Ourense, Monforte e Allariz.
Por Europa Press / Redacción | SANTIAGO DE COMPOSTELA | 19/07/2024 | Actualizada ás 17:04
Os concellos galegos prepáranse para recibir a partir do próximo 25 de xullo a unhas 470 persoas inmigrantes procedentes de Canarias e que, na súa maioría, foxen da guerra en Mali e contan con solicitude de asilo. Segundo o trasladado polo Goberno, a previsión é que cheguen a Santiago, a Becerreá, a Ourense, a Monforte e a Allariz.
Os primeiros, uns 200, está previsto que cheguen "de forma graduada" a partir do día 25 ao albergue do Monte do Gozo da capital galega. A alcaldesa, Goretti Sanmartín, insistiu en que a cidade é "acolledora e hospitalaria" e que "desde o primeiro momento" mostrou a súa disposición a colaborar. "Non se pode xogar coas persoas que están a sufrir unha crise, fuxindo dos seus lugares de procedencia. O Concello sempre vai estar", afirmou.
Así mesmo, reivindicou que "calquera colaboración entre administracións" debe ser "a maneira de proceder en todos e cada un dos asuntos", pero, engadiu, "moito máis cando se fala de temas de refuxiados, de xente que ten que irse dos seus fogares".
BECERREÁ: "UNHA INXECCIÓN ECONÓMICA IMPORTANTE"
Pola súa banda, o alcalde de Becerreá, Manuel Martínez, asegurou que non espera problemas coa chegada destas persoas e augura que será "unha inxección económica importante" para o municipio. En concreto, a esta localidade lucense, tal e como lle trasladou a ONG á que o Ministerio de Migracións encargou o procedemento, está previsto que cheguen 69 persoas a partir do 31 de xullo e aloxaranse no Hotel Os Ancares.
En canto á acollida que lles dará o municipio, o rexedor, en declaracións a Europa Press, mostrouse convencido de que a maioría da poboación recibiraos "con total satisfacción" Así, explicou que en Becerreá xa hai comunidades de persoas doutros países como Romanía, Marrocos, Colombia ou Perú, entre outros. Por iso, Manuel Martínez sinalou que se veñen con "ganas de traballar" serán ben recibidos.
"Haberá algún veciño que poida dicir algo, pero creo que en xeral a xente está disposta a recibilos e que non haxa problemas. Necesítase xente en construción, fontaneiros, albaneis, camareiros... Somos unha poboación maior e envellecida e recibimos con total satisfacción que esas persoas estean aquí", afirmou.
