Sindicatos celebran que a Xunta rectifique e abone a subida salarial
A CIG reclama isto mesmo para os complementos do persoal do Sergas, cuxos incrementos foron pactados en abril de 2023.
Por Europa Press / Redacción | Santiago de Compostela | 19/07/2024 | Actualizada ás 19:55
Os sindicatos educativos que asinaron o acordo de outubro de 2023 (CCOO, ANPE e UXT) celebran a "rectificación" da Xunta ao permitir finalmente que a subida salarial do 2%, que aplicará desde este mes para todo o persoal autonómico con efecto retroactivo, se vaia a aplicar sobre "todos os conceptos", é dicir, tendo en conta tamén os aumentos dos complementos que entraron en vigor a comezos deste ano 2024.
De feito, a Consellería de Educación, Ciencia, Universidades e FP recoñeceu o xoves, despois de denuncialo CSIF, que se produciu "un erro na confección de nóminas" pero que "xa está a ser corrixido", polo que o aumento si se aplicará este mes de xullo.
MESMA RECLAMACIÓN NO SERGAS
Sobre esta mesma cuestión, pero no ámbito sanitario, a CIG queixouse de que esa subida do 2%, que aprobou o Goberno central pero que se aplica a todas as administracións, "non se aplicará" nos complementos do Sergas.
E é que, igual que para os docentes, o ano pasado os sindicatos da mesa sectorial do Sergas, neste caso, si foi por unanimidade, asinaron un acordo que implicaba subidas en complementos como os de gardas, destivos e nocturnidade que, como mínimo, foron do 7,9%. Uns aplicáronse en xullo de 2023 e outros, en xaneiro deste ano.
Así, o secretario nacional de CIG-Saúde, Manuel G. Moreira, asevera que "en ningún momento" os asinantes do acordo asumiron "que non serían de aplicación" estas subidas salariais sobre os complementos. Por tanto, esixe á Xunta que o materialice.
EDUCACIÓN "OCULTA INFORMACIÓN"
Volvendo ao ámbito educativo, tamén este venres a CIG-Ensino emitiu un comunicado no que denuncia que a Xunta "oculta información" e "prepara unha redución importante de postos de traballo" nos centros. Isto dedúceo a central nacionalista porque "a escasas horas" para que finalice o prazo no que as xefaturas de inspección deben contar con propostas dos inspectores para decidir que prazas ofértanse en Infantil, Primaria e Educación Especial, "non existe ningún documento compartido coas organizacións sindicais máis aló das xubilacións en cada provincia".
