O BNG e o PSdeG rexeitarán o teito de gasto por "raquítico", "insuficiente e conformista"
O PP di que representa a "cifra máis alta da historia" e é "sensato e acorde coa situación actual" e as previsións económicas.
Por Europa Press / Redacción | Santiago de Compostela | 30/07/2024 | Actualizada ás 16:34
O BNG e o PSdeG avanzaron que rexeitarán o teito de gasto, que se debaterá este mércores nun pleno no Parlamento de Galicia que arrincará ás 13:00 horas, por considerar que é "raquítico", "insuficiente e conformista". O Consello da Xunta deu o luns luz verde a un teito de gasto non financeiro de 13.954 millóns de euros para 2025, o que supón 344 millóns máis que a cifra de límite definitivo de 2024, con fondos Next Generation, un 2,5% máis.
Nas súas comparecencias tras a reunión da Xunta de Portavoces que fixou a orde do día desta sesión, que contempla como único punto o debate deste documento, a viceportavoz parlamentaria do PSdeG, Lara Méndez manifestou que o teito de gasto proposto polo PP é "insuficiente, continuista e conformista" e "repercute negativamente nos servizos públicos no estado de benestar dos galegos e as galegas".
Así mesmo, dixo que Galicia crece menos que a media española e que o seu crecemento se debe exclusivamente ao impulso do resto de España e aos fondos europeos, "os cales, por outra banda, non se están aproveitando nin executando de forma efectiva". Por iso, insistiu na necesidade dunha política económica con marca galega e maior ambición, sen depender só do crecemento de España. A socialista reiterou o seu compromiso coa defensa dun mellor financiamento para Galicia que se adapte ás súas singularidades: "Nós loitaremos por políticas que garanten a calidade dos servizos públicos e o benestar dos galegos e galegas", indicou.
Méndez sinalou que mentres Rueda "saca peito" co teito de gasto proposto, as listas de espera na sanidade galega alcanzan niveis críticos, con tempos prolongados para consultar con médicos de cabeceira e especialistas. Tamén destacou que en dependencia, as persoas maiores e dependentes enfrontan longos tempos de espera para o recoñecemento da mesma, con solucións insuficientes como os bonos coidado que non0 cobren as necesidades reais das familias.
Por outra banda, en relación ao mercado laboral sostivo que Galicia mostra un crecemento do emprego do 0,3%, significativamente inferior ao 2% de media en España, e un aumento do desemprego do 2,2%, con 2.600 persoas máis en paro no segundo trimestre de 2024. Ademais, dixo que Galicia podería dispor de máis diñeiro pero que a negativa do PP a votar o teito de gasto no Congreso deu lugar a un "axuste financeiro" que afectou negativamente o gasto social, cun impacto de 422,4 millóns de euros entre 2024 e 2026, o que, segundo dixo, repercute na calidade dos servizos públicos esenciais.
