Alerta en Galicia por máis de 2.000 casos de estafa á hora de solicitar préstamos que piden como aval o coche
Avogados alertaron do suceso despois de que xulgados de toda España estean a declarar nulos estes contratos por ser contrarios ás leis.
Por Europa Press / Redacción | VIGO | 01/08/2024 | Actualizada ás 13:12
Avogados alertaron de que máis de 2.000 galegos poderían estar afectados pola "estafa" dos préstamos de aval con coche, despois de que xulgados de toda España estean a declarar nulos estes contratos por ser contrarios ás leis. En concreto, o despacho de avogados Caruncho & Tomé puxo o foco en distintas compañías que publicitan nas súas páxinas anuncios de "liquidez en 24 horas" usando o coche como aval.
"Pero esta publicidade esconde a realidade: os préstamos con aval de coche consisten nun préstamo encuberto a través do cal o propietario do coche obtén un préstamo rápido e, sen decatarse, entrega ao prestamista a titularidade do seu coche. É dicir, unha venda simulada", indicaron os avogados.
Segundo eles, esta práctica está cada vez máis estendida en Galicia e no resto de España. "Segundo as nosas estimacións, na Comunidade calculamos que os afectados poden superar os 2.000. Nos últimos meses presentamos un goteo constante de demandas de clientes que se viron prexudicados por esta práctica que, en definitiva, é unha estafa", sinalou Carlos Tomé, socio director de Caruncho & Tomé.
El explica que estes préstamos rápidos, de ata 35.000 euros, concédense a consumidores de forma inmediata, sen intervención de notario, sen importar se quen o solicita se atopa incluído nun ficheiro de morosos. O único requisito é que estea avalado polo coche. "O modus operandi é sinxelo e moi cómodo para o cliente que solicita o diñeiro: este transfire a titularidade ao prestamista e, despois, asinan un contrato de aluguer de coche con opción de compra, a través do cal, quen fora o dono do coche ata ese momento, pode seguir usándoo a través do pago dunha cota mensual. Ademais, o importe obtido polo préstamo encuberto adoita ser moi inferior ao do prezo de mercado do vehículo ofrecido en garantía", indicou o bufete.
Así mesmo, os contratos de aluguer adoitan contemplar que, se o prestatario non paga unha cota, o contrato quedará resolto, de tal forma que o prestatario perderá, de forma definitiva, a propiedade do coche. "A realidade é que estas empresas se valen das necesidades económicas dos consumidores para enganalos e que estes subscriban compravendas do seu propio vehículo a cambio dun préstamo no que o importe que devolverán será moi superior ao que lle foi prestado", engadiu Tomé.
