Un paciente con intoxicación etílica que agrediu a persoal sanitario de Vilagarcía tivo que ser reducido pola policía
No Grove outro paciente agrediu verbalmente a unha enfermeira.
Por Europa Press / Redacción | PONTEVEDRA | 05/08/2024 | Actualizada ás 16:28
A área sanitaria de Pontevedra e O Salnés expresou este luns o seu rexeitamento ás dúas agresións ocorridas esta fin de semana cara a persoal sanitario na PAC de San Roque, en Vilagarcía de Arousa, e do Grove. O incidente máis destacado tivo lugar durante a garda da noite do sábado, 3 de agosto, na PAC de San Roque, en Vilagarcía, e foi necesaria a intervención de varias dotacións policiais.
Un paciente con síntomas aparentes de intoxicación etílica e alterado accedeu ao centro sanitario para ser atendido. No transcurso da asistencia, xa dentro da consulta, comezou a tratar de agredir tanto ao persoal médico como ao vixiante de seguridade, e a lanzarlles o material sanitario e outros obxectos que se atopaban no box. Este usuario tivo que ser reducido polos axentes da Policía e, en primeira instancia, trasladado ao Hospital Público do Salnés polo estado no que se atopaba. O facultativo recibiu un empuxón e o persoal de seguridade, ao intervir, lesionouse nun dedo.
En canto ao incidente rexistrado na PAC do Grove, tamén nunha das gardas de noite desta pasada fin de semana, tratouse dunha agresión verbal dun paciente a unha enfermeira, o que requiriu igualmente a intervención do persoal de seguridade, aínda que neste caso o enfermo atendeu a razóns e cesou na súa actitude violenta.
Este tipo de situacións reiteradas no tempo, lembrou a área sanitaria, propiciou a contratación de efectivos de Seguridade nalgún dos seus Puntos de Atención Continuada, en aras de garantir o normal funcionamento da actividade asistencial das urxencias extrahospitalarias. Ademais, todos os puntos de atención continuada da área contan con cámaras de videovixilancia para poder identificar os agresores.
Por mor destes acontecementos, o xerente da área Sanitaria de Pontevedra e O Salnés, José Flores Arias, reivindicou a necesidade de "garantir a seguridade do persoal por enriba de todo". "Temos que coidar a quen nos coida para que os nosos pacientes sexan os primeiros beneficiados, non estamos dispostos a tolerar ningún tipo de agresión verbal nin física e estamos a tomar todas as medidas legais para atallar este problema incomprensible", dixo.
FESTA DO ALBARIÑO
Por outra banda, a área sanitaria de Pontevedra e O Salnés puxo en valor o operativo asistencial despregado en Cambados durante a celebración da LXXII edición da Festa do Albariño, que alcanzou durante as cinco xornadas deste evento unha actividade de 687 asistencias sanitarias, que cursaron unha evolución positiva.
O pasado mes de abril mantívose un primeiro encontro entre directivos sanitarios e responsables do servizo de Atención Primaria de Cambados co alcalde desta localidade, Samuel Lago Ozón, e a portavoz de Servizos Sociais, atención á diversidade funcional e Sanidade, Regina Núñez Mosteiro, na que acordaron a participación conxunta de ambas as institucións nas xuntas de coordinación asistencial e de seguridade. Consolidouse desta maneira "a colaboración conxunta da área sanitaria de Pontevedra e O Salnés e do Concello de Cambados para conseguir un satisfactorio desenvolvemento asistencial e de seguridade" neste evento, destacan.
