Asistidas 74 persoas en 59 accidentes de tráfico rexistrados ao longo da fin de semana en Galicia

O servizo de Urxecias Sanitarias de Galicia-061 asistiu durante a fin de semana a un total de 74 persoas debido a 59 accidentes de tráfico ocorridos nas estradas galegas. Nun comunicado, a Fundación Pública Urxencias Sanitarias de Galicia-061 explica que o período contabilizado comprende desde as 15.00 horas do venres, 6 de setembro, ata as 23.59 horas do domingo, día 8. Ademais, o sábado foi o día que rexistrou máis sinistros, con 23 accidentes de tráfico.

A Central de Coordinación do 061, que xestiona e coordina os servizos prehospitalarios en casos de urxencia e emerxencia en Galicia, recibiu nestes días 67 chamadas en relación cos accidentes de tráfico. Estas alertas xeraron 59 asistencias sanitarias por parte do persoal do 061, que atendeu a un total de 74 persoas. A proporción de homes e mulleres atendidos foi do 66 % e do 34 % respectivamente. Nas idades dos feridos, obsérvase que o 32 % dos atendidos tiña entre 20 e 34 anos. Por provincias, Pontevedra foi a que máis sinistros rexistrou, con 28 accidentes de tráfico durante os desprazamentos destas datas. Na Coruña rexistráronse 17, en Lugo 10, e, por último, en Ourense, catro.

Os recursos sanitarios mobilizados polos médicos que atenderon as chamadas na Central de Coordinación do 061 foron 69. Así, as ambulancias asistenciais de soporte vital avanzado asistiron en nove accidentes, as ambulancias asistenciais de soporte vital básico asistiron en 56 sinistros e os equipos sanitarios de Atención Primaria que completan a dotación destes vehículos asistenciais de soporte vital básico do 061, no caso de necesitalo, prestaron asistencia sanitaria en catro accidentes. En 56 casos os feridos foron trasladados aos centros sanitarios correspondentes e en 16 ocasións atendeuse no propio lugar do incidente.

Helicóptero do 061 | Fonte: Arquivo