A intelixencia artificial e a detección precoz, claves para abordar con éxito as enfermidades raras que afectan a 200.000 galegos

Máis de 20 especialistas de primeiro nivel destacaron a intelixencia artificial (IA) e a detección precoz como claves para abordar con éxito as enfermidades raras, que afectan en Galicia a 200.000 persoas. Así o sinalaron nun encontro de traballo sobre enfermidades raras celebrado este luns en Santiago. Un dos aspectos máis relevantes abordados no encontro foi, precisamente, o uso da intelixencia artificial no diagnóstico destas patoloxías que, segundo recoñeceron os expertos, "xa está a xogar un papel crucial na redución dos tempos de diagnóstico".

Neste sentido, tamén resaltaron que a IA axuda aos médicos a identificar "rapidamente" as enfermidades raras baseándose nos síntomas e datos clínicos introducidos. O presidente da Fundación Bamberg explicou que "a rapidez no diagnóstico é esencial para mellorar o prognóstico destas patoloxías, o 80 % das cales teñen unha orixe xenética". Deste xeito, a Fundación Bamberg, en colaboración co Servizo Galego de Saúde (Sergas), organizou este evento cuxo obxectivo era avaliar os avances realizados no marco da Estratexia Galega en Enfermidades Raras 2021-2024 e subliñar o liderado de Galicia na implementación de novas tecnoloxías para o diagnóstico e tratamento destas enfermidades.

UNHA COMUNIDADE "PROACTIVA"

Por outra banda, Galicia foi unha comunidade "proactiva" neste tema e identificou "de maneira precoz" ata 48 patoloxías co seu 'Programa Galego de Cribado Neonatal'. Tal e como detallou na clausura do acto o conselleiro de Sanidade, Antonio Gómez Caamaño, este programa examinou en tres anos a máis de 463.000 neonatos, "permitindo instaurar tratamento no prazo recomendado de 679 deles".

Ademais, Gómez Caamaño puxo en valor o "gran traballo" realizado en Galicia para mellorar o diagnóstico, tratamento e seguimento das enfermidades raras e destacou que a intención do Goberno galego é impulsar nos primeiros meses de 2025 un novo documento de 'Estratexia de Enfermidades Raras', "enriquecido coa experiencia destes anos e con obxectivos máis ambiciosos". Con todo, o responsable de Sanidade subliñou que outras das medidas da Xunta destacadas na loita contra estas enfermidades son "a posta en marcha de tres unidades funcionais multidisciplinares e a creación dun rexistro de pacientes".

A IA e a detección precoz, claves para abordar con éxito as enfermidades raras que afectan a 200.000 galegos | Fonte: MONICA ARCAY CARRO