Onda de Calor en Galicia: as temperaturas soben ata 15º esta fin de semana

A onda de calor que afecta desde este venres traerá temperaturas superiores a 40ºC durante o fin de semana en varios puntos, co sábado como día álxido do episodio, pero as temperaturas descenderán a partir do luns polo achegamento dunha fronte atlántica cunha masa de aire máis fría, segundo informou a Axencia Estatal de Meteoroloxía (AEMET).

Nos próximos días, a dorsal vaise a reforzar sobre boa parte de España, coa formación mesmo dun anticiclón illado en niveis altos. A escasa renovación do aire en niveis baixos, xunto coa forte insolación propia da época, darán lugar a un ascenso das temperaturas máximas e mínimas.

As anomalías, entendidas como a desviación da temperatura máxima respecto da media, alcanzarán valores pico no norte peninsular. O sábado, as máximas estarán de 10 a 15 ºC por encima da media da época na metade sur de Galicia, País Vasco, sur de Cantabria, A Rioxa, Navarra e norte de Castela e León. O domingo, a situación será especialmente anómala no País Vasco e Cantabria, con anomalías cálidas que se situarán ao redor dos 15 ºC.

MARCAS DE RÉCORD

As anomalías cálidas serán moi importantes no terzo norte durante o fin de semana. Poderían caer algunhas marcas de máximas e mínimas. En definitiva, esta vez o norte peninsular non se librará da intensa calor.  O domingo, un fluxo de ventos do sur levarán a calor extrema até a mesma costa cantábrica. Superaranse os 35 ºC de forma xeneralizada en puntos do interior de Galicia e Asturias. 

O domingo poden verse noites tropicais en puntos onde son moi pouco habituais. Na noite do sábado ao domingo, as mínimas poderían non baixar dos 20 ºC en Navarra, A Rioxa, País Vasco, puntos de Asturias, Cantabria e interior sur de Galicia.

O luns, baixarán as temperaturas, pero seguiremos falando de calor intensa. 

ALERTAS E SITUACIÓN EN GALICIA

Os avisos por calor en Galicia estenderanse este sábado a case a metade do territorio galego, onde se esperan altas temperaturas que poderían alcanzar os 40 graos centígrados na conca do río Miño.

Así, toda a provincia de Pontevedra estará este sábado en alerta por calor, un aviso que será amarelo na costa e o interior e laranxa na conca do Miño. A alerta laranxa tamén estará activa no resto da conca do Miño ao seu paso pola provincia de Ourense, onde se espera que o mercurio poida elevarse ata os 40ºC. Os avisos por calor afectarán o resto da provincia ourensá salvo á montaña, mentres que o sur será a única zona de Lugo na que haberá alerta por altas tempraturas. Na Coruña, o aviso afectará ao longo de toda a xornada ás zonas do interior, nas que se esperan temperaturas de 34ºC ou máis durante as horas centrais do día.

O episodio de calor intensificarase este sábado en Galicia coa entrada de aire cálido en superficie acompañado da aproximación de aire frío en altura, o que podería provocar a formación de treboadas no interior.

Nun comunicado, a Consellería de Sanidade lembra á cidadanía a importancia de hidratarse e evitar a inxesta de bebidas quentes, alcohólicas, café, té ou azucaradas. Tamén recomenda comer froitas e verduras, así como prescindir de comidas copiosas, vestir adecuadamente con roupa e calzado fresco e transpirable; e permanecer en espazos ventilados ou acondicionados.