O Carballiño, centro do turismo do interior este domingo

O concello ourensán do Carballiño celebrou este domingo a súa tradicional Festa do Polbo, unha cita que cumpre 62 edicións de historia atraendo cada ano a máis visitantes, algo que celebran desde o consistorio onde este ano non poden falar de cifras, "son tantos os visitantes que sería inabarcable calculalo", din.

A festa durou unha semana entre múltiples actividades, desde concertos e pasacalles con charangas ata un partido de fútbol, o Trofeo do Polbo, pasando polo popular desfile de penas de camisetas; aínda que o día grande foi este domingo coa comida tradicional no Parque Municipal.

Desde primeira hora da mañá, miles de persoas non temeron ás altas temperaturas para achegarse ata esta zona da localidade, para gozar da preparación do prato estrela do municipio ourensán na súa festa grande, que xa vive a súa segunda edición como Festa de Interese Turístico Internacional, algo que resaltou o concelleiro de turismo, Manuel Dacal.

Tras dar un breve discurso no recinto, agradecendo a representantes institucionais, patrocinadores e, sobre todo a veciños e visitantes, o éxito dun ano máis da Festa do Polbo, Dacal fixo unha valoración "moi positiva" de toda a semana de festexos. "Que dicir que non se diga cada ano? É unha das festas máis grandes de Galicia, unha romaría clásica e consolidada. A acollida é sen dúbida moi satisfactoria todos os anos e, desde o recoñecemento como Festa de Interese Turístico Internacional, só mellora. Temos moita proxección internacional, leste mesmo ano fixéronnos unha reportaxe para unha televisión de Corea do Sur, iso fala do alcance desta festa", sostivo o edil.

"REFERENTES ECONÓMICOS"

Distintas autoridades tampouco se quixeron perder a cita. Entre os asistentes, o conselleiro de Emprego, Comercio e Emigración, José González, que acompañado polo director de turismo de Galicia, Xose Merelles, participou nesta edición destacando o potencial do produto. "O polbo forma parte da nosa identidade", festexou pondo de relevo o traballo das pulpeiras ás que cualificou como "referentes económicos desta comarca" e pondo tamén así en valor "a todas as familias que potencian cada día este sector".

Na mesma liña expresouse o presidente da Deputación Provincial, Luís Menor, quen destacou o "orgullo" de poder "apoiar ano tras ano" a única festa gastronómica da provincia de Ourense que conta coa declaración de Interese Turístico Internacional.

O conselleiro de Emprego, José González, na súa intervención na Festa do Polbo do Carballiño.. XUNTA | Fonte: Europa Press