Abre o prazo para que os concellos pidan axudas da Xunta para crear prazas de 0 a 3 anos en escolas infantís
É a terceira vez que o Goberno galego pon esta opción de financiamento a disposición.
Por Europa Press / Redacción | SANTIAGO DE COMPOSTELA | 20/08/2024 | Actualizada ás 11:36
A Xunta abrirá este mércores o prazo, que será dun mes, para que os concellos soliciten axudas para a creación de prazas de 0 a 3 anos en escolas infantís municipais. Segundo recolle a orde publicada este martes no Diario Oficial de Galicia (DOG), a reapertura deste paquete de axudas, dirixida a que os concellos cren novas prazas públicas no primeiro ciclo de educación infantil, débese ao interese mostrado por algunhas administracións locais.
O importe total desta liña de subvencións é de 34,1 millóns de euros, procedentes do Plan de recuperación, transformación e resiliencia que sufraga a Unión Europea (NextGenerationEU).
A Consellería de Política Social e Igualdade explicou nunha nota de prensa que, despois das convocatorias de 2022 e 2023, esta é a terceira vez que o Goberno galego pon a disposición dos concellos esta opción de financiamento.
"Nesta nova convocatoria alónganse os prazos para dar máis facilidades aos concellos que xa se acolleron ou queiran acollerse agora a estas axudas", esgrimiu a Xunta. Así mesmo, o prazo para a creación de prazas amplíase un ano, polo que se financiarán todas aquelas xeradas ata decembro de 2025.
GRATUIDADE DA ETAPA 0-3 ANOS
Por outra banda, a Consellería lembrou que a principios deste mes o Consello da Xunta aprobou un investimento superior ao sete millóns de euros de fondos propios para "o funcionamento" e para "dar continuidade" á gratuidade nas escolas infantís e puntos de atención á infancia que dependen dos concellos.
Deste xeito, o Goberno galego financiará "unhas 7.300 prazas" en 142 centros de 0 a 3 anos de titularidade municipal, nun "esforzo compartido" coas administracións locais.
