A Policía Autonómica tramitou 1.600 denuncias relacionadas con delitos no medio rural o ano pasado
Destacan as actuacións na loita contra incendios forestais, control de produtos fitosanitarios e prevención da gripe aviaria.
Por Europa Press / Redacción | Santiago de Compostela | 30/08/2024 | Actualizada ás 14:11
A Policía Autonómica realizou máis de 8.600 inspeccións e tramitou máis de 1.600 denuncias no marco da súa colaboración coa Consellería de Medio Rural durante o pasado ano.
Segundo informa a Consellería de Presidencia, Xustiza e Deportes, este labor conxunto abarca prevención e investigación de incendios forestais, actuacións en materia de sanidade e benestar animal, inspección e control de establecementos expendedores de produtos fitosanitarios e actividades relacionadas coa praga do nematodo do piñeiro e coa prevención da gripe aviaria.
A maior parte da actividade, detalla, centrouse na loita contra os incendios forestais, con 7.755 inspeccións e 1.497 denuncias. As inspeccións na área de sanidade e benestar animal realizadas en transportes, feiras e mercados ascenderon a 490, con 102 denuncias tramitadas, engade.
En concreto, a campaña de prevención da gripe aviaria supuxo 200 inspeccións e 13 denuncias. En canto ao control sobre a venda e uso dos produtos fitosanitarios, imprescindibles para a produción agrícola, realizáronse 10 inspeccións e tramitáronse cinco denuncias.
Pola súa banda, o control da praga do nematodo do piñeiro sumou dúas inspeccións e ningunha denuncia. A maiores, ao longo de 2023 fixéronse 182 inspeccións de control de uva, cunha denuncia, e 12 inspeccións de transportes de perecedoiros, con tres denuncias.
