Os alumnos galegos, chamados a secundar o próximo 2 de outubro unha folga centrada na problemática da vivenda
O colectivo Erguer denuncia o aumento nos prezos de aluguer, a turisficación das cidades e a falta de prazas en residencias universitarias.
Por Europa Press / Redacción | SANTIAGO DE COMPOSTELA | 04/09/2024 | Actualizada ás 18:35
A organizaciçón estudantil 'Erguer. Estudantes da Galiza' presentou este mércores a súa nova campaña de setembro, centrada na "problemática da vivenda", que terminará o próximo 2 de outubro coa convocatoria dunha folga estudantil. Así o indicou a organización nunha nota de prensa, na que tamén denunciaron cuestións concretas como o aumento dos prezos de aluguer, a turisficación das cidades e a escaseza de prazas en residencias universitarias nos campus galegos.
O responsable da organización, Artai Gavilanes, subliñou que estes aspectos son os "principais focos" dunha crise que "limita, emprobece e condiciona aos mozos galegos". Ante esta situación, 'Erguer' propón tres medidas concretas que van desde ampliar as prazas en residencias públicas, a crear unha bolsa de vivenda pública para os estudantes, ata limitar os prezos de aluguer.
"Estas medidas son esenciais para mellorar as condicións de vida do alumnado a curto prazo e avanzar cara a un modelo máis xusto", esgrimiu Gavilanes. Con todo, a organización estudantil lembrou que durante a xornada de folga do 2 de outubro haberá mobilizacións en todas as cidades galegas.
