Persoal da recollida de lixo de Carballo comeza a folga indefinida para pedir un "convenio digno"
As xornadas de folga afectarán a todas as quendas en todas as franxas horarias de prestación do servizo
Por Europa Press / Redacción | Santiago de Compostela | 06/09/2024 | Actualizada ás 18:49
Os traballadores da recollida de lixo de Carballo entrarán en folga indefinida este domingo ás 22:30 horas tras "non chegar" a un acordo na negociación do convenio colectivo e ante a "negativa da empresa concesionaria" a presentar unha proposta integrada que "permita dignificar os salarios e as condicións laborais".
Segundo informou a CIG, a asemblea de persoas, ante a última oferta da UTE Carballo, acordou continuar co calendario establecido e dar inicio á folga indefinida e intensificar as mobilizacións a partir deste domingo.
As xornadas de folga afectarán a todas as quendas en todas as franxas horarias de prestación do servizo, tanto na recollida, no punto limpo e nas oficinas. Tras 28 horas de folga, a empresa presentou unhas táboas que o conxunto do persoal considerou "ofensivas", nas que "practicamente os salarios de 2024 non crecen, salvo un raquítico 0,75% de media".
