O PPdeG non aclara se Feijóo irá á comisión de investigación sobre os contratos públicos: "Queren facer un circo disto"
Prado insta á oposición a ver os portais de transparencia e contratación: "Non imos facer o seu traballo".
Por Europa Press / Redacción | SANTIAGO DE COMPOSTELA | 12/09/2024 | Actualizada ás 13:37
A secretaria xeral do PPdeG, Paula Prado, acusou a BNG e PSdeG de querer facer "un circo" co impulso dunha comisión de investigación sobre os contratos da Xunta con empresas como Eulen, na que é directiva a irmá de Alberto Núñez Feijóo, e salientou que os procesos dos contratos son "públicos" e "todos" os datos están "nos portais de transparencia e contratación".
En declaracións aos medios, tras convocar para facer un balance da situación da sanidade galega nas inmediacións dun centro de saúde compostelán, Prado foi preguntada en relación a se os populares oporanse a que Feijóo compareza nunha comisión que o BNG avanzou que se activará con ou sen apoio dos populares (os seus 25 deputados, un terzo do hemiciclo, permítelles impulsar unha iniciativa deste tipo na lexislatura).
Os nacionalistas decidiron estrear o curso político co anuncio de que utilizarán a súa 'bala de prata' e impulsarán esta comisión na que queren pór baixo lupa os contratos, pero tamén a forma en que a administración adquiriu material sanitario na pandemia ou o suposto sobrecusto de 470 millóns pola fórmula elixida para a construción do Hospital Álvaro Cunqueiro sinalado polo Consello de Contas.
Prado retou ao BNG a rexistrar "canto antes" a petición para que se active esta comisión e esgrimiu que o que debería "enfadar" aos nacionalistas é "o sobrecusto que xerou para os galegos e galegas o incumprimento do Goberno de España de facer gratuíta a AP-9, un incumprimento dese pacto de investidura que asinou a señora Pontón e que tamén prometeu en campaña o señor Besteiro".
A pesar da insistencia dos xornalistas, a número dous do PPdeG evitou aclarar se Feijóo acudirá á comisión da Cámara galega (nacionalistas e socialistas vano a pedir) e replicou que "os procesos de contratación na Xunta son públicos, transparentes, e están feitos en mesas de contratación formadas por funcionarios públicos". Por tanto, concluíu que PSdeG e BNG "están a cometer unha irresponsabilidade" ao "sementar dúbidas sobre a profesionalidade dos funcionarios públicos".
"NON FAREMOS O TRABALLO Á OPOSICIÓN"
Sobre as denuncias da oposición de que o Goberno galego non remitiu ao Parlamento a documentación sobre os contratos que solicitaron, a dirixente popular replicou que os populares "non" van facer "o traballo" aos seus rivais políticos. "Que se metan na páxina web, no portal de contratación e busquen os contratos que din. E se atopan algo, que fagan o que teñan que facer", retou.
"O portal de transparencia dá toda a información que necesita a oposición. Se queren enredar e facer, como fan sempre, un circo destas cousas, alá eles. Se queren ser ordenados e ser serios, os portais de transparencia e contratación están aí para ver todos e cada un dos contratos e procesos de adxudicación pública", recalcou. Finalmente, insistiu en que as mesas de contratación para os procesos da Administración pública están conformadas "por funcionarios e non por políticos". "Son os que, en base a criterios técnicos deciden cal é a mellor empresa para prestar un servizo", resolveu.
