Os incendios forestais da Gudiña e Laza queiman xa máis de 210 hectáreas

As hectáreas afectadas polo incendio forestal rexistrado en Laza e o incendio da Gudiña ascenden xa a 160, nunha tráxica xornada de luns para a provincia de Ourense. Segundo o último parte da Consellería do Medio Rural, na parroquia de Pentes, na Gudiña, permanece activo desde as 13.18 horas un lume que avanza sen control e cuxa superficie calcinada aumenta xa a unhas 150 hectáreas. No seu control traballan catro axentes, 14 brigadas, seis motobombas, catro pas, dous técnicos, 10 helicópteros e oito avións.

Pola súa banda, quedou estabilizado ao redor das 18.00 horas, aínda sen controlar, o incendio rexistrado en Trez, en Laza, e que segundo as últimas estimacións provisionais afecta a unha superficie de 60 hectáreas. Para a súa estabilización mobilizáronse 15 axentes, 28 brigadas, 17 motobombas, dúas pas, un técnico, sete helicópteros e catro avións.

Por último, ás 15.04 horas deste luns foi controlado o lume rexistrado no municipio pontevedrés de Arbo, na parroquia de Mourentán, que se iniciou o domingo ás 23.41 horas. A superficie afectada é dunhas 21 hectáreas e nos labores de extinción participan dous técnicos, sete axentes, 24 brigadas, 18 motobombas, dúas pas e dous helicópteros.

O lume da parroquia de Venceáns, en Entrimo, que afectaba ao parque Natural Baixa Limia - Serra do Xurés, quedou extinguido pouco antes das 20.00 horas deste luns. O departamento autonómico informou de que se trataba dunha reprodución do incendio rexistrado o pasado 4 de setembro no mesmo lugar, despois de que se iniciase en Portugal. Ata a zona mobilizouse un axente, cinco brigadas, tres motobombas, un helicóptero e dous avións. Finalmente calcinou unha pequena zona de só 0,01 hectáreas.