O rexistro de tumores de Galicia reforzarase con IA para afondar no coñecemento do cancro

O conselleiro de Sanidade, Antonio Gómez Caamaño, presidiu no Complexo Hospitalario Universitario Ourense unha reunión con diversos especialistas do Rexistro Galego de Tumores (Regat) para tratar a incorporación de técnicas de Intelixencia Artificial co obxectivo de obter uns resultados máis exhaustivos da incidencia do cancro en Galicia. Segundo informou a Xunta, o titular de Sanidade incidiu na necesidade de "aproveitar toda a potencia" que achegan as novas tecnoloxías, xa que a súa incorporación ao Regat permitirá avanzar na vixilancia dos tumores, medir con maior precisión o seu impacto e adecuar a xestión sanitaria aos casos reais.

Nesta liña, subliñou que o procesamento de linguaxe natural reforzará o rexistro galego de tumores, destacando as melloras que suporá a relación de variables vinculados á incidencia, mortalidade e a supervivencia de cada tipo de cancro. O Regat é un instrumento co que conta a Xunta para identificar e rexistrar dunha forma detallada e continuada os tumores diagnosticados na poboación residente en Galicia desde 2010. "Contar con esta ferramenta é fundamental para coñecer o comportamento do cancro en Galicia", destacou o conselleiro á vez que lembrou que se trata dun "ámbito de absoluta prioridade" para a Consellería de Sanidade.

Dermatoscopia dixital na procura de melanomas ou cancros na pel | Fonte: XUNTA - Arquivo