Obrigan ao Banco Santander a aceptar dúas leiras para cancelar unha hipoteca

A sección cuarta da Audiencia Provincial da Coruña desestimou un recurso de apelación do Banco de Santander e obrígalle a cumprir un convenio de dación en pago que pretendía anular, o que implica que a entidade deberá cancelar unha débeda hipotecaria a cambio de quedar con dúas leiras rexistradas en Ferrol e a condonación parcial da débeda por case 52.000 euros.

Segundo se recolle na sentenza do tribunal provincial, os prexudicados subscribiron co banco un préstamo hipotecario en 2006, modificado posteriormente. Ante a falta de pagamentos, acordouse a dación en pago de dúas leiras para saldar a débeda.

Tras a negativa do banco de aceptar ese convenio, os afectados recorreron aos tribunais e un xulgado de primeira instancia da Coruña deulles a razón, declarando perfeccionado o contrato de dación en pago e establecendo que a entidade debía cancelar o saldo do préstamo a cambio desas leiras.

O Banco Santander interpuxo recurso de apelación, alegando que houbo reunións e "tratos preliminares dun futuro contrato" cos prestatarios, pero en ningún caso se produciron actos xurídicos que confirmasen ese acordo. Ademais, na súa argumentación ante a Audiencia esgrimiu tamén que houbo "un erro" no consentimento do banco.

O tribunal rexeitou eses argumentos e ratifica a posición do xulgado da primeira instancia "posto que ambas as partes litigantes admiten que os tratos preliminares mantidos alcanzaron o consenso sobre a dación en pago de dúas leiras do Rexistro da Propiedade de Ferrol e a condonación parcial da débeda por importe de 51.934 euros, coa condición de que os prestatarios estivesen ao corrente dos pagos por IBI e comunidade de propietarios dos referidos inmobles, que foi cumprida por estes antes de fixar a cita en notaríaa".

Por outra banda, o banco tamén expuxo no seu recurso que descoñecía que o préstamo gravaba tamén outra leira e que o prestatario quería quedar con ela libre de cargas tras adquirila con ese préstamo.

Pero a Audiencia matiza que "é claro que ao banco constáballe necesariamente cales eran as leiras gravadas na primeira escritura de préstamo hipotecario e mantíñanse na de novación", e matiza que esa terceira leira hipotecada era propiedade da nai e sogra dos prestatarios e a súa compra non se financiou co diñeiro prestado.

Oficina do Banco Santander durante unha protesta | Fonte: Ricardo Rubio - Europa Press