Asolagada a base helitransportable de San Xoán de Río mes e medio despois da súa inauguración

Como é posible que un edificio inaugurado hai mes e medio estea xa asolagado?. Esa é a pregunta que se fai CIG-Autonómica tras o acontecido na base helitransportable de San Xoan de Río. 

O pasado 31 de xullo a Consellería de Medio Rural inaugurou con todos os honores a remodelación desta base. No acto participaron a Conselleira de Medio Rural, o director xeral de Defensa do Monte ademáis de todas as autoridades pertinentes. Segundo os datos publicados pola Consellería de Medio Rural a inversión ascendeu a case 1.200.000€, unha cantidade nada despreciable para unhas instalacións que, nun principio, soamente van estar operativas durante tres meses ao ano, é dicir, o tempo que dure a tempada de alto risco contra os incendios forestais. 

Con todo, un mes e medio despois da súa inauguración, tal e como denuncia CIG-Autonómica, observanse deficiencias tan graves na súa construcción e posta en funcionamento, "que incluso podería poñer en risco a seguridade dos propios traballadores que alí se atopan destinados". Así, apuntan a nundacións que se produciron nas instalacións tras o paso da primeira gran borrasca do outono, Aitor.  

Este sindicato asegura que estas deficiencias nas obras poden empeorar de xeito considerable a medida que vaia avanzando o inverno. Por iso, anuncian que realizará un seguimento exhaustivo ao Plan de Infraestructuras de Medio Rural 2020-2026, ademáis do proxecto millonario do CILL (Centro Integral de Loita contra o Lume Forestal), onde se investiron 3,5 millóns de euros con fondos públicos, según os datos da propia Consellería. Centros, lembra CIG-Autonómica que se atopan "na maioría do tempo pechado non existindo nas RPTs de Medio Rural ningún persoal asignado a pesar de ser inaugurado polo actual presidente da Xunta de Galicia en decembro do ano 2023".