O xulgado aproba a reestruturación de Actemsa para manter "a totalidade" do emprego
Actemsa dá por superada a crise ocasionada polo afundimento dos mercados pesqueiros, o que significou a caída de moitos operadores globais
Por E.P. | SANTIAGO DE COMPOSTELA | 03/10/2024 | Actualizada ás 16:31
O Xulgado do Mercantil número 2 da Coruña notificou a Actemsa, compañía operadora de túnidos e peixe conxelado, a homologación do seu plan de reestruturación que permitirá manter "a totalidade" dos seus 250 empregos directos na súa planta da Pobra do Caramiñal --e máis de 400 indirectos--.
Nun comunicado, a empresa informa de que este plan "suporá a reestruturación financeira total da débeda da compañía presidida por Severino Escurís, un restablecemento do equilibrio entre o capital e o patrimonio neto da sociedade, a transformación de Actemsa SA en sociedade de responsabilidade limitada e a futura fusión con Brisiña SA, o que suporá o control desta compañía reforzando negocio e patrimonio".
Con este auto, de data 27 de setembro, Actemsa dá por superada a crise ocasionada polo afundimento dos mercados pesqueiros, o que significou a caída de moitos operadores globais. Así, agradece o compromiso coa compañía das entidades financeiras, provedores e os grupos Jealsa e Albacora.
O director executivo e vicepresidente de Actemsa, José Luís Escurís, destacou: "A posta neste plan de reestruturación en clave de futuro, para blindar e ampliar o emprego, con máis de 250 postos de traballo que incrementaremos en breve por necesidades de produción, unha vez superada a crise global que afectou aos mercados pesqueiros".
Actemsa é unha empresa familiar fundada en 1994 por Severino Escurís Batalla dedicada á importación e exportación a nivel global de peixes conxelados, así como ao procesado de túnidos. Así mesmo, presta servizos de conxelación e de asistencia técnica a empresas conserveiras e pesqueiras.
Situada no polígono da Tomada, na Pobra do Caramiñal, comezou como comercializadora de pescados --túnidos en especial-- e cefalópodos, para o que instalou as súas cámaras frigoríficas na Pobra, con compras por conta propia e servizos de frío a outras empresas da zona. No ano 2000, iniciou a elaboración de lombos de atún, con destino a firmas conserveiras de toda Europa. Actualmente, importa pescado do tres grandes áreas pesqueiras mundiais de atún: Latinoamérica, África e Asia.
