Galicia lidera o fomento do castiñeiro por superficie cultivada e calidade na produción

O director xeral de Planificación e Ordenación Forestal, José Luís Chan, participou este venres na inauguración do 'III Foro da castaña', onde reivindicou o papel de Galicia como líder no fomento do castiñeiro, tanto en superficie cultivada como na calidade dos produtos asociados a esta especie e na loita contra pragas. Neste sentido, fixo referencia ao 'Plan Forestal de Galicia' e, concretamente, ao 'Programa Estratéxico do Castiñeiro e da Produción de Castiñeiro' como follas de ruta que está a seguir a Xunta neste ámbito.

Ademais, sinalou que, neste marco, a Consellería do Medio Rural está a desenvolver accións como a recuperación de plantacións de castiñeiro para froito, a restauración de soutos tradicionais, a promoción da Indicación Xeográfica Protexida Castaña de Galicia ou o control de pragas e enfermidades. Así mesmo, fixo fincapé no 'Plan piloto de fomento da xestión conxunta dos soutos', que se está desenvolvendo en diversas localizacións estratéxicas nas provincias de Lugo e Ourense. Deste xeito, a Consellería lembrou nunha nota de prensa que esta semana se publicou no Diario Oficial de Galicia (DOG) a resolución de axudas para a creación destas entidades, cun investimento que supera os 775.000 euros.

TERCEIRA EDICIÓN DO FORO

Por outra banda, a Deputación de Ourense, sinalou que este ano o foro centrouse en ofrecer unha visión da evolución do sector a nivel internacional, nas demandas dos operadores comerciais respecto das variedades e calidades do produto, así como en ofrecer formación práctica en temas como a poda ou os enxertos para a xestión de soutos por parte dos produtores. Esta actividade enmárcase no convenio que a Consellería ten asinado co Instituto Ourensán de Desenvolvemento Económico (Inorde), así, o presidente de Inorde, Rosendo Fernández, asegurou que nesta edición completouse o aforamento con máis dun cento de profesionais.

Con todo, este sábado os participantes realizarán unha visita técnica á Asociación de Propietarios de Soutos de Parada de Sil Canón do Sil, unha agrupación forestal de xestión conxunta. Así, durante a mañá desprazaranse ata a nave de clasificación, a nova plantación de castiñeiros e tamén coñecerán a Sociedade Cooperativa Galega (SOFRAGAL) en Nogueira de Ramuín, dedicada á comercialización da castaña.

Medio Rural sinala a Galicia como líder no fomento do castiñeiro por superficie cultivada e calidade na produción | Fonte: XUNTA