Voces en Compromiso piden “dar un xiro decidido” a esta formación
Ivan Marrrube destacaba que “xa non vale o si, pero non” e aposta por dirixir o “barco de compromiso para unha integración na flota da marea”.
Por Galicia Confidencial | Lugo | 11/01/2016 | Actualizada ás 13:25
“É o momento de actuar sen ningún tipo de complexo, xa non vale "o si, pero non", con xenerosidade total, fundamentando o noso traballo unicamente baixo criterios de interese xeral e ben común.Cada día somos máis os que militamos en ideas en non en siglas, e estas para estar vivas, han de ser ferramentas políticas útiles para as demandas da sociedade”, destaca este destacado militante.
“Compre sen demora, dar un xiro decidido, marcar xa novas coordenadas, dirixir o barco de Compromiso cara unha integración na flota da marea e remar de forma útil para un cambio de goberno no País”, indica nun artigo que se pode ler íntegramente no GC Aberto, o espazo de Galicia Confidencial para que lectores e asociacións poidan publicar libremente opinións e comunicados.
Ivan Marrube foi militante do Bloque Nacionalista Galego e concelleiro en Alfoz. Formación que abandonou en 2012 para crear, xunto ós seus compañeiros, un novo partido Independentes polo Val. Foi o principal abandeirado da iniciativa cidadá de fusión dos concellos de Alfoz e Valadouro. En setembro de 2012 foi elixido en primarias para encabezar a candidatura de Compromiso por Galicia pola provincia de Lugo para as eleccións ao Parlamento de Galicia de 2012. Actualmente é membro da CPN de Compromiso por Galicia.
