O BNG reclama á Xunta que aclare as cifras do rescate de catro autovías e recupere tamén a AG-55 e AG-57

O BNG mostrou os seus receos sobre a operación anunciada pola Xunta o pasado luns para rescatar por 297 millóns de euros a xestión de catro autovías en réxime concesional, un modelo de colaboración público privada que os nacionalistas consideran "ruinoso".

Nunha rolda de prensa celebrada este mércores no Parlamento de Galicia, o viceportavoz parlamentario do Bloque, Luís Bará, demandou ao Goberno autonómico que aclare as cifras sobre esta operación de rescate que piden que se estenda tamén sobre as autoestradas AG-55 (A Coruña-Carballo) e AG-57 (Val Miñor).

Os nacionalistas avanzaron o rexistro dunha batería de iniciativas coa que, en primeiro lugar, queren que a Xunta "recoñeza o erro cometido" cun modelo para estas infraestruturas que carrexou "custos elevadísimos e gravosos pairas as arcas públicas".

Ademais, reclaman ao Goberno autonómico que atenda a recomendación do Consello de Contas "e revise os incrementos de tarifas" que en 2014 adoptou para evitar a quebra das concesionarias para reducilos ata o ano 2032 ao "estritamente indispensable" de face a "asegurar a viabilidade financeira dos contratos".

Esta revisión cifrada en 44 millóns de euros por Contas, segundo Bará, debería ir acompañada dunha renegociación das contías anunciadas pola Xunta para recuperar que o catro autovías pasen a mans da administración, algo que tamén reclama para as autoestradas de Carballo e Val Miñor.

E é que, para o viceportavoz parlamentario do Bloque, as zonas polas que discorren estas autoestradas de pago para os usuarios (as outras catro fináncianse con cargo aos orzamentos da Xunta co modelo de 'peaxes en sombra') sofren un "agravio comparativo" ao non ser rescatadas tamén.

BESTEIRO

O secretario xeral do PSdeG, José Ramón Gómez Besteiro, acusou á Xunta de "regalar diñeiro ás concesionarias", mentres os galegos continúan pagando as "peaxes ao sol" das autoestradas AG-55, que une Carballo e Coruña e a AG-57, entre Vigo e o Val Miñor.

Nun acto en Caldas de Reis, Besteiro pediu á Xunta "coherencia" e trasladoulle que se piden a gratuidade para as autoestradas que son titularidade do Estado, tamén debería ofrecer a gratuidade para as que son titularidade da Administración autonómica. "O contrario é ser incoherente", dixo. Neste sentido, criticou que o presidente da Xunta, Alfonso Rueda, e o PP non poñan en marcha bonificacións para os "paxes ao sol" que cada día pagan os usuarios da AG-55 e a AG-57. Para eles, segundo denunciou, "non hai ningún rescate", o que os sitúa como "veciños de segunda para Rueda e o PP".

Ademais, sostivo que o rescate das vías con peaxes na sombra anunciado o luns pola Xunta "xa se tiña que producir no ano 2014". Naquel momento, segundo afirmou, fíxose un rescate "única e exclusivamente en favor dunhas concesionarias que, segundo dixo o Consello de Contas, non tiñan dereito a ningún tipo de indemnización", apuntou. "Que se fai? Regalar diñeiro a esas concesionarias, iso día, pero que sigan pagando os usuarios tanto da Costa da Morte como da zona sur de Galicia", incidiu.

Todo iso nun acto no que Besteiro sostivo que mentres que coa Xunta "todos os días" os cidadáns galegos teñen que pagar as "peaxes ao sol", o Goberno socialista pon en marcha bonificacións para as autoestradas da súa titularidade, como a AP-9, que chegarán ata o 75% "mentres se avanza cara á gratuidade".