Os funcionarios do Estado cobran 8.000 euros ao ano menos que os traballadores doutras administracións autonómicas e locais
O custo de suplir as diferenzas salariais entre os traballadores da AGE e os de CC.AA. e concellos sería de 1.487 millóns, segundo CSIF.
Por Europa Press / Redacción | MADRID | 28/10/2024 | Actualizada ás 14:16
O sindicado de traballadores públicos CSIF denunciou que os traballadores da Administración Xeral do Estado (AGE) cobran de media 8.000 euros menos ao ano que os traballadores doutras administracións autonómicas e locais por realizar o mesmo traballo. Durante unha rolda de prensa este luns, o presidente de CSIF, Miguel Borra, avisou que estas diferenzas supoñen que "cada día" aos empregados públicos do SEPE, da Seguridade Social ou dos ministerios se lles desconten "20 euros en relación a comunidades e concellos".
Durante a rolda de prensa, CSIF presentou un estudo onde se evidencias estas diferenzas salariais entre os traballadores públicos de concellos, comunidades autónomas e a AGE. Estes últimos supoñen preto do 6 % dos case 3 millóns de traballadores públicos da administración, é dicir, 179.413 empregados. Segundo o estudo, en total, suplir as diferenzas salariais dos traballadores públicos da AGE fronte a traballadores de CC.AA. e concellos suporía 1.487 millóns de euros. Isto débese a que, no caso de persoal funcionario e estatutario o custo da equiparación salarial sería de máis de 1.325 millóns de euros, cunha media de desigualdade retributiva de 8.690 euros menos anuais, mentres que no caso do persoal laboral alcanzaría os 161 millóns de euros, 7.380 euros menos de media por traballador.
PROPOÑEN EQUIPARAR OS SALARIOS EN TRES ANOS
Na rolda de prensa, desde CSIF propuxeron iniciar unha recuperación para equiparar os salarios en tres anos e dividilos da seguinte maneira: para 2025, 744 millóns (50 % do total), no 2026, 446 millóns (30 %), e no 2027, 298 millóns (20 %). "Non é que pretendamos na Administración Xeral do Estado gañar 1.487 millóns de euros máis, o que pedimos é deixar de perder cada ano os 1.487 millóns de euros de diferenza salaria", destacan desde CSIF. Á súa vez, recalcan que o persoal da AGE foi "moi maltratado" polos sucesivos recortes que se foron dando desde 2010 e que se traduciron nunha perda de poder adquisitivo do 15,9 % destes traballadores.
"É un custo total e absolutamente asumible para o Goberno", indicou o presidente de CSIF en relación á equiparación salarial do persoal da AGE. De igual maneira, durante o encontro con medios, Borra lembrou que en só dous meses caducará o "pésimo" acordo salarial que asinou o Goberno con CCOO e UGT, que supuxo unha perda de poder adquisitivo do 5 % nestes dous últimos anos e dun 20 % desde o recorte salarial do 2010. Por iso, instou ao Goberno a negociar para que os traballadores públicos non perdan poder adquisitivo. "Cansámonos de que a súa única resposta (a do Goberno) sexa o silencio", subliñou.
