PP e o grupo de Jácome aproban este venres o plan de estabilización de emprego temporal de Ourense

O goberno municipal Ourense prevé aprobar este venres na xunta de goberno local o Plan de Estabilización de emprego temporal, mantendo os criterios de desempate previamente establecidos.

Así o fixo saber o rexedor municipal, Gonzalo Pérez Jacome, que trasladou que o mércores, na sesión extraordinaria do pleno, habilitáronse 20 millóns de euros en modificacións orzamentarias "grazas á abstención do Partido Popular tras unha negociación"; xa que os populares esixían para sacar adiante as modificacións de crédito a aprobación do Plan de Estabilización e a súa publicación no boletín oficial.

"Atendemos á súa esixencia, manter no proceso de estabilización de empregados públicos temporais o criterio de desempate que beneficiaría ao traballador que fose dese concello", manifestou Jacome, advertindo que dos 104 traballadores que se estabilizarán "ao redor dun 5 ou un 10% poderán verse afectados o feito que funcionarios doutras administracións, con máis de 17 anos de antigüidade, computasen para méritos".

"Nós preferiamos outro criterio de desempate, pero aceptamos por un ben superior, neste caso desbloquear a xestión do concello con eses 20 millóns de euros", manifestou o alcalde de Ourense, que concluíu que "ata podería darse o caso de que ningún funcionario doutra administración quixese trasladarse ao concello de Ourense, co cal o cambio sería irrelevante".

A maiores, a xunta de goberno lcoal do concello estuda aprobar o proxecto de modificación orzamentaria por importe de case 17 millóns de euros, coa finalidade de pagar o diferencial do custo do servizo de autobuses urbanos durante os últimos anos.

Con este acordo o concello pagaríalle á empresa concesionaria a diferenza económica que existe entre a cantidade abonada durante estes anos e o custo real dos servizos prestados. Manifestan desde o consistorio que a cifra -16.661.861 euros- "é sensiblemente inferior á que pagaría o concello se se licitou un novo contrato" de transporte urbano.

NERVIOS DO ALCALDE

Dita modificación de crédito xa recibiu a crítica do Bloque Nacionalista Galego, que xa en pleno extraordinario advertía que, a pesar da aprobación dos 20 millóns de euros, debíanselle máis de 14 millóns á empresa encargada do transporte público da cidade.

"Na réplica do alcalde, moi nervioso porque sabe que o que facemos desde o Bloque é rigorosamente certo, tenta negar a existencia desa débeda. O certo é que apenas vinte e catro horas despois a xunta de goberno local recoñeceu esa débeda e aprobará unha nova modificación de crédito por un importe máis de 16 millóns, dos cales 1.448.508 euros corresponden coa demora", expoñen desde o BNG.

"Cóllese antes dun mentireiro que un coXO e agora será o propio alcalde quen se desdiga tendo que recoñecer primeiro a débeda e despois tendo que sometela a consideración do pleno", indica o portavoz da formación, Luís Seara, quen insiste en que a situación económica do concello "está a piques de colapsar" porque "se trata dun consistorio ao bordo da quebra técnica". Os nacionalistas apuntan directamente ao Partido Popular.